Nongstoiñ, Nohprah 18
Ha ka Sngi U Blei jong ka taïew, ka Nongkasen Parish ka la ïoh ban sei biang sa uwei pat u Lyngdoh Sohblei uba dei uwei na ki dkhot jong ka Balang ïa uba la tip ruh kum u Dikon Cyryl Parïong uba la long ruh kum u Sohblei uba 4 na katei ka Parish.
Ïa u Dikon Cyryl Parïong, la ïoh ban pynkyntang Lyngdoh da u Lyngdoh Sad ka Nongstoiñ Jyllaniam u Most Rev. Wilbert Marweiñ (Bishop) ïa kaba la pynlong ha phyllaw ka ïingmane jong ka Mary Help of Christians Mawroh.
Haba phai khyndiat shaphang u Lyngdoh Sohblei ba thymmai, la ong ba utei u Lyngdoh Sohblei ba thymmai u dei u khun jong u Bah Roland Lyngkhoi bad ka Kong Biatris Parïong na ka shnong Mawroh. La kha ïa u ha ka 4 tarik Nailar 1994 bad la ïoh ban pyndep ïa ka Baptisma ha ujuh u snem.
La sakhi ruh ha katei ka sngi da ki hajar ngut ki riewngeit ka Balang Katholik, kiba la wan ban ïa shim bynta ha kane ka sngi ba kyrpang jong ka balang.
Ha katei ka sngi la sdang ruh ïa ka jinglehniam da ka Proseshon jong ki Lyngdoh bad u Lyngdoh Sad u la ïoh ban pyndep ïa ki niam ki rukom naduh kaba pynsleh da ka umphniang, ban pynsmai, ban pynkhamti ïa ka khuri jong ka Sakrament Bakhuid sha u phadar Cyryl Parïong bad kiwei kiwei ki jinglehniam. Hadien kata ki kmie ki kpa bad ki bahaïing ki la ïoh ban pynphong ïa ka jaiñphong ki Lyngdoh ïa la u khun.
Shuh shuh hadien katei ka jingpynkyntang, u phadar Cyryl Parïong u la ïoh ban ïashimbynta lang ryngkat u Lyngdoh Sad ban pyndep ïa ka jingkñia ïa ka Mass Bakhuid.
Katei ka sngi ka dei ruh kum shi bynta ban rakhe lehkmen ïa ka jingkynjoh sha u Mawmer ba 75 snem jong ka Balang Katholik Mawroh ïa kaba la tip ruh kum ka Jubili Platinum.
Hadien katei ka Mass Bakhuid u Lyngdoh Sohblei ba thymmai kata u phadar Cyryl Parïong u la ïoh ban pyndep ïa ka jingmane Sakrament Bakhuid ha ka jingïaseng jong ka nohphai sngi.
Ha katei ka sngi kaba kyrpang la ïadonlang ruh u phadar John Albert Ryntathiang Parish Priest ka Nongkasen Parish, Phadar Gaspar Wahlang Assistant Parish Priest, phadar Anselm Nonglang Vicar General, phadar James Anderson Syiemlieh procurator, phadar Roland Lyngdoh ki sister ki brother bad ki riewngeit.
