Shillong, Nohprah 18
Ka Hynñiewtrep Youths’ Council (HYC) ha ka Lah Sngi U Blei ka la kynmaw burom ïa ka lyngkhuh sngi ïap ba 83 snem jong u Babu Soso Tham da kaba leit buh syntiew hakhmat u mot sahnam ha Soso Tham Auditorium.
Ha kane ka sngi, nalor u President ka HYC u Bah Roykupar Synrem, la ïadon lang ruh u President barim u Bah Robertjune Kharjahrin, ki dkhot nongïalam ka seng lem bad kiwei kiwei.
Haba ai jingkren ha kane ka jingïalang kynmaw burom ïa une u ‘riewkhraw ha ka thoh ka tar, u Bah Roykupar Synrem u la ong ba u Myllung Soso Tham nalor ba u dei uwei na ki ‘riewkhraw ha ka thoh ka tar, u dei ruh u nonghikai ïa ka jaidbynriew.
Une u nongïalam ka HYC haba pynpaw ka jingbynñiaw halor ka jingbym shimkhia ka Sorkar Jylla ban kyntiew bad ban ai burom ïa ki nonghikai, u la ong ba kum ka seng ka buh ka jingdawa na ka Sorkar Jylla ba kan pynthikna ba baroh ki nonghikai ha ki skul kin shah kynthup ha kajuh ka thup rukom siew tulop.
Shuh shuh u la ong ba dang shen na ka liang jong ki nonghikai kiba la shongthait ruh ki la pynpaw ba kim pat ïoh satia ïa ka baibam tymmen bad kane ka long shisha ka jinglehraiñ namar ki la shakri ïa ka Jylla da ki phew snem.
U Bah Roykupar u la ong ba kumba ka long mynta, la ïohi ba ka jingburom ka sorkar ïa ki nonghikai ka long beit thik tang ha ka sngi kyrpang jong ki. Kumta ka seng ka kyntu ba ka Sorkar kam dei ban ai burom ïa ki nonghikai tang ha ka sngi kyrpang hynrei ka dei ban ai burom bad kyntiew ïa ki nonghikai ka Jylla da ki polisi ki ban tei ïa ka bha ka miat bad ban ai burom ïa ki nonghikai ka Jylla.
Ha kaba ïadei bad ka jingthmu ka Sorkar ban wanrah noh da ki kot NCERT ha ki skul, u Bah Roykupar u la ong ba ka Sorkar ka dei ban pynthikna ba ki lynnong (Syllabus) ki ban shah kynthup ha ki kot skul kim dei ban ïalam bakla halor ka histori ki paidbah bad ka Jylla Meghalaya.
U la ong ba ka Sorkar Jylla ka dei ban pynthikna ba ki kot NCERT ki ban pyndonkam ha ki skul ki dei ban pynneh ïa ka histori jong ka imlang sahlang bad ka Jylla khamtam haba ïadei bad ka synñiang ki ‘riewkhraw trai ri trai muluk ïa ka Jylla.
Nalor ki jingkren bad buh syntiew, na ka liang ka HYC ka la ïoh ruh ban sam ïa ki khusnam sha ki nongjop ha ka jingïakob jingai jingkren lyngkot (Short speech) kaba la pynlong da ka seng.
Shuh shuh, ka seng ha kane ka sngi ka la pynkup burom ruh ïa ki samla kiba ïoh jingjop ha ka jingïakob ïatai nia lyngkot halor ka ‘Jingma Ka Jaidbynriew namar ka Jingai Jaitkpa’ bad ka jingthoh ese halor ka phang pdeng ‘Khulom Ksiar’ ïa kaba la pynlong da ka Socio Cultural Cell jong ka seng.
