Shillong, Nohprah 18
Ha kane ka aïom lehkmen Khristmas bad hashwa ban pdiang ïa u Snem Thymmai 2024, bun ki shnong ki thaw ki la kup da ka dur kaba i khuid bad itynnad lyngba ka jingshimkhia ki Dorbar Shnong bapher bapher ban pynlong ïa ka jingpynkhuid shnong kaba baroh ki nongshong shnong ki ïa mih ryntih lang ban ïashimbynta ban pynkhuid ïa ki lynti syngkien, ki nala ba tuid jaboh bad surok ruh kumjuh.
Napdeng kiba bun ki shnong ki thaw ha sor bad ha khapsor kiba la shim ïa kane ka sienjam ban wanrah ka khuid ka suba ha la shnong, ka shnong Mawlai Phudmuri ka la shim ïa kawei ka sienjam ha kum kane ka sngi pynkhuid shnong khamtam ha kane ka aïom lehkmen, kata ka long ban sneng lypa ïa baroh ban long kiba adkar bad ka jinglehkmen kam dei satia ban pynmih kano-kano ka jingthut jingwit ïano-ïano la ka dei ïa kiba shong ba sah hapoh ka shnong ne kiwei pat kiba nabar shnong.
Haba phah ïa kane ka khubor mynta ka sngi ka 18 tarik Nohprah 2023 kaba dei ruh ka sngi pynkhuid shnong jong Dorbar Shnong Mawlai Phudmuri, u President ka Village Defence Party (VDP) Mawlai Phudmuri, u Bah S. Khonglam u la ong ba ka long ka jingkmen kum ki nongshong shnong ban pynkhuid ïa ka shnong ka thaw bad u ai burom ïa ka Dorbar Shnong Mawlai Phudmuri bad baroh ki nongshong shnong kiba la shimkhia bad ïasnohkti lang ban wanrah ka jingkhuid jingsuba.
Une u nongïalam ka VDP Mawlai Phudmuri ha kajuh ka por u la ong ba kumba la ïoh ïa ka jingkhuid jingsuba jong ka shnong baroh kawei, u la sneng lypa ïa baroh ki nongshong shnong kumjuh kiba nabar shnong ban long kiba adkar ha kum kane ka aïom lehkmen naduh ka Khristmas bad Snem Thymmai.
U Bah Khonglam u la ong ba ka VDP ryngkat bad ka Seng Samla lem bad ka Dorbar Shnong bad Seng Longkmie jong ka shnong kin ïatreilang ban khanglad ïa kino-kino kiba pyrshang ban pynmih ka huri-hura ha kane ka aïom lehkmen bad maham ruh ïa kiba wan ban pyndonkam ïa ki rudnong jong ka shnong Phudmuri ban leh sngewbha namar ha ki snem ba la leit noh, ki ju don ki briew kiba wan la ka dei na shnong ne bar shnong sha khlaw Lawmali kaba don hajan jong shnong na ka bynta ban leh sngewbha bad pynmih ïa ka huri-hura.
Haba kyntu ïa baroh ban shim ka jingkitkhlieh ban lehkmen da kaba jai-jai bad tipbriew tipblei, u Bah Khonglam u la ong ba ka VDP bad ka Seng Samla Mawlai Phudmuri ha ryngkat ka Dorbar Shnong bad Seng Longkmie kin ïatreilang ban peitngor ha kine ki sngi rakhe khamtam lei lei ha ka miet ban pdiang ïa u Snem Thymmai ban nym mih kano-kano ka bym sngewtynnad ha shnong ha thaw bad mana ruh ïa kito kiba pynmih huri-hura ha kine ki sngi lehkmen.
Haba bynrap ïa ka jingkren u President ka VDP, u Vice President ka Seng Samla Mawlai Phudmuri u samla Bernadean Lyngkot u la ai khublei ïa ki nongshong shnong bad ka jingïatylli ka shnong Phudmuri ha kiba bun ki liang na ka bynta ka jingbha jong ka shnong ka thaw bad ka imlang sahlang.
Ha kajuh ka por u la phah ka kitbok kitrwiang ïa ki samla ki ban sa ïakhun ïa ki eksamin bapher bapher ba kin lah ban pynkhreh bad thoh bha bad kyntu ïa ki samla ban lehkmen da ka jingsngewthuh ha kane ka aïom lehkmen Khristmas bad Snem Thymmai, bad kyntu ïa baroh ban long kiba adkar ha ka ïaid ka ïeng, bad ka ktien ka thylliej ha shnong ha thaw bad ha ki surok kiba ïaid lyngba ka shnong Phudmuri sha kiwei pat ki shnong kiba marjan.
