Khliehriat, Nohprah:
Ka Newhill LP School Ratacherra kaba la seng naduh u snem 1998, ha ka 14 tarik Nohprah ka la rakhe ïa ka lyngkhuh dap 25 snem ka jingïaid lynti ban ai jingshakri ïa ki khynnah ha ka liang ka pule-puthi.
Ïa u maw sahnam jong ka jingdap 25 snem la wan ban plie da u MDC ka Narpuh, u Bah Emlangki Lamare ha ka jingdonlang ka Block Mission Coordination East Jaiñtia Hills District, ka Kong T. Challam, u MDC barim ka thaiñ, u Bah Decsous Pohshna, u Waheh Shnong, u Bah Pynkhlaiñ Dhar, u Bah Khamsngur Pohing, Waheh Shnong barim, ki nonghikai ki khynnah skul bad kiwei-kiwei ki ‘riew rangbah ka Shnong.
Ha kane ka sngi la sam ïa ki jingai sngewbha sha ki nongseng, ki khynnah skul banyngkong, kumjuh sha ka nonghikai kaba nyngkong eh, ka Kong Theiris Sumer bad kyrpang ïa u Bah Wenly Pohshna kum u nongïalam lynti ïa ki dkhot jong ka SMC.
La sdang nyngkong ïa ka Newhill L.P. School, Ratacherra ha ka por ba ka dong Newhill ka dang don tang khyndiat tylli ki tnum ïing da ki 8 ngut ki rangbah kiba dei ki nongshong ïing ba nyngkong eh jong kane ka dong.
Kine ki rangbah ki long u Bah Worly Pohing, (L) Philip Pohshna, Bah Promwill Sumer, (L) Slin Mukhim, (L) Diness Najiar, (L) Maiboi Mukhim, Bah Charles Mukhim bad (L) Yet Pohshna.
Ha kaba sdang eh, kitei ki rangbah ki ïakynduh shibun ki jingeh khamtam haba ki dei tang ki briew ki bym pat don jingnang jingstad bad ruh kim dei kiba don ba em.
Ka jaka ban shna ïing skul ruh kim pat ïoh, kumta ki la pynlong skul noh ha ïing u Ma Worly Pohing. Ka nonghikai kaba la ïarap ban hikai nyngkong eh ka dei ka Kong Theiris Sumer khlem kano-kano ka jingsiew hynrei la shu burom ïa ka tang da kaba leit ïarap wer kwai ïa ka shisien shisnem bad ki khynnah skul ha katei ka por ki dang don kumba 7 ngut eiei.
Hadien kane pat ki la leit wad jingïarap na u Ma Wenly Pohshna ba shong ba sah ha Umkiang bad u leit ïalam ïa ki sha ki bor ba halor kiba dei peit ïa ka pule-puthi, khamtam sha ophis Deputy Inspector of School, Khliehriat Sub-Division ba ha kito ki por ba dei peit da u Bah W. Lyngdoh.
