Tura, Nohprah:
U MDC ka Tura bad Vice-President ka BJP, u Bernard Marak u la kyntu ïa ki nongïalam ban pyndonkam ïa ki skhim MP, MLA lyngba ki C&RD Block bapher-bapher ban pynkhuid ïa ki jingsiew ba sahteng jong ki nongïoh jingmyntoi ‘job card’ hapdeng ka jingkyrduh pisa kaba ka Jylla ka mad.
U MDC u la bynrap ba ki Block ki shah bankhia ban pynkhuid ïa ki jingsiew ba sahteng haba ïadei bad ka skhim MGNREGA, PMAY, PM – Kisan, ba don jingduna dkhot met, ‘riew kynthei bad ki skhim baibam tymmen.
“Kane ka la wan na ki nongïoh jingmyntoi ba duna ka ïoh ka kot kiba khmih lynti ban ïoh ïa ka jingsiew jong ki hashuwa ka Khristmas, hynrei imat kane kam pat urlong. Lada ki MP bad MLA ki kheiñ kor ïa la ki nongthep ‘vote’, lah ban pynïasoh ïa ki skhim jong ki sha ki Block bad sam sha ki. Kane kan jin da la long ka jingaisngewbha Khristmas kaba paka tam kaba ki nongthep ‘vote’ ki lah ban ïoh hadien ba ki la pynjop ïa ki,” la ong u Bernard.
U MDC u la bynrap ba ka jingkyrmen na bynta ki kmie ki kpa ban pyndap ïa la ki ïing ki sem da ka jingkmen kan dei lyngba ka jingpynkhuid ïa ki jingsiew ba sahteng shuwa ka Khristmas.
“Ki la trei minot bad sah sa tang shi taïew na bynta ka Khristmas. Haduh mynta, ki dang shah kyrngah haba leit pan ïa ki jingsiew na ki C&RD Block bapher-bapher. Kane ka long kumjuh na bynta ka baibam ki samla pule, ki ‘bill’ jong ki kontraktor, nongtrei kontrak jong ki tnad treikam bapher-bapher, nonghikai bad nongtrei ka koit ka khiah. Ka jingbym ïoh biang por ïa ka jingsiew kan pynsniewdur ïa ka jingrakhe Khristmas,” u la pynpaw.
Shuh shuh u Bernard u la kyntu ïa ki nongïalam ka Jylla ban ïatylli bad pyrshang ban pynkhuid ïa ki jingsiew shuwa ka Khristmas khnang ba ki longïing kiba shah pynduh ïa ka hok kin ïoh ka lad ban phuh samrkhie bad rakhe ïa ka Khristmas.
