Shillong, Nohprah:
Ka Presbyterian Upper Primary School, Thynroit ka la pynkupburom ïa ki nongseng jong ka skul bad kynmaw ïa u synñiang u bynhei jong ki kum shibynta jong ka jingrakhe ïa ka jingdap 50 snem ka skul.
Ïa kane ka jingrakhe la pynlong dang shen ha kaba la donlang u MLA ka Mawkynrew u Bah Banteidor Lyngdoh kum u kongsan, u MDC Bah Martle N Mukhim, u Bah Harkin Warjri, Sordar ka shnong Thynroit nalor kiwei pat kynthup ki nongpynïaid barim bad ba mynta jong ka skul, ki nonghikai lem ki khynnah skul.
Ha kane ka sngi la ïoh ruh ban pynkupburom ïa ki Chairman, Secretary, Headmaster barim kane skul da ki nongïalam ka Jingïaseng Kynthei Balang Thynroit.
Ïa ka khana lyngkot shaphang ka skul la pule da u Bah S Nongspung, Secretary barim bad bud sa ka jingplie paidbah da u kongsan ïa u maw sahkynmaw ka jingdap 50 snem jong ka skul.
Nalor ki jingshad jingrwai na ki khynnah skul, la ïoh ruh ïa ka jingkren na u Headmaster ba nyngkong eh ka skul, u Bah H Kharumnuid, uba la pynkynmaw shaphang ki por bad ki jingïaid lynti jong ka skul ha ki snem ba la sdang ïa ka naduh u snem 1973.
Haba ai jingkren kum u kongsan, na ka liang u Bah Banteidor u la ong ba kum u nongmihkhmat u tyrwa ban don ïa ka jingïatreilang khnang ba ka skul bad ka thaiñ hi kan kiew shakhmat.
Dang ha u Jylliew, 2023, u Bah Banteidor u la plie ïa ka ïing skul ba thymmai jong ka Secondary Section kaba dei shi bynta jong kane ka skul na ka mang tyngka jong ka skhim Special Rural Work Programme (SRWP) 2022-2023.
U Bah Martle u la shim ïa ka bynta ban pynkupburom ïa ki khynnah skul kiba la pass ïa ka eksamin Secondary School Leaving Certificate (SSLC) mynta u snem jong kane ka skul bad ai ki kyntien kyrkhu kyrdoh ba ka skul kan nang ïai kiew shakhmat ha ki liang baroh.
La ïoh ruh ka jingkren na u Sordar ka shnong Thynroit, u Bah Harkin Warjri uba la pynpaw ba ka skul ka la nang kiew shaphrang bad ka jingdon jong ka hi ka la long ka jingsarong ïa ka shnong bad ka thaiñ hi baroh kawei.
La pynkut ïa ka jingrakhe dap 50 snem da ka jingot ïa u cake jong jingdap 50 snem ka skul da u kongsan lem bad u symbud kongsan nalor ki bor pynïaid skul bad ki nonghikai.
