Shillong, Nohprah 18
Ka Prof. Badaplin War na ka tnad pule Khasi, North Eastern Hill University (NEHU) ka la kyntu ïa ki khun samla ka juk mynta ban sngap ïa ka jingmaham u Myllung U Soso Tham ba ka long kaba donkam ban long kiba bit ba biang bad ïeng ha la ki jong ki kjat hashuwa ban shongkha-shongman bad ïoh khun ïoh kti.
“Lada ngi leh kumne, ngin sa lah ban weng ïa kiba bun ki jingeh kaba ka imlang-sahlang ka ïakynduh mynta,” la ong ka Prof. War haba kren ha ka jingïalang kaba la pynlong da ka tnad Arts & Culture ban kynmaw burom ïa ka lyngkhuh sngi ïap kaba 83 jong u Myllung Soso Tham.
Ka la ong ba u Myllung ha ki jingthoh jong u, u la kren ruh shaphang ka jinglong-jingman ki kam saiñ hima sima ha ka por jong u. Ka la pynkynmaw ba katto-katne na ki poitri ha ki “Ki Sngi Barim U Hynñiewtrep”, u Myllung u la maham ba ka bamsap ka dei kaei-kaei ka ban pynjot shi syndon ïa ka imlang-sahlang bad kumta dei ban ban kiar katba lah na kane ka kam.
“U Soso Tham kumta u long uba donkam bha ha ka juk ba mynta,” la ong ka Prof. War.
Katkum ka jingong jong ka, u long ruh uba sngewnguh ïa ka mei mariang bad ki sur kyrpang jong ka Ri-lum Khasi.
Ka la ong ruh ba u Soso Tham lyngba ki kam jong u, u pynpaw ïa ka jingshemphang ba ïar haba ïadei bad ka riti dustur ha ka thoh ka tar jong ka pyrthei khamtam jong ki Phareng bad ki Grik.
Ha kawei ka liang, u Commissioner & Secretary ka tnad Arts & Culture, Bah F.R. Kharkongor uba la ai jingkren kum u kongsan ha ka jingïalang, u la ong ba ki dei ban don shuh ki jingpynkylla ktien bad ki jingthoh halor ki kam jong u Myllung Soso Tham khnang ba un ym long u ‘riewkhraw u bym ïoh jingithuh bad ba ka jingkhraw jong u kam dei ban sahkut tang hapoh ka Jylla.
“Ki kam jong u, ki rukom pyrkhat, ki nongrim kiba u ïeng, dei ban tip ïar da kiba bun balang,” la ong u Bah Kharkongor. Ha kajuh ka por, u la ban jur ban pynïajuh bad ki jinglong-jingman ki por jong ka juk stad ba mynta.
U la ong ruh ba ka long kaba donkam ban pyndonkam hok ïa ki bor teknoliji ban nang kyntiew shuh-shuh ïa ki kam jong u Myllung sha ki kyrdan ba shajrong.
Nalor kane, u Bah Kharkongor u la tynjuh ïa ki samla ban shna ïa ki ‘Graphic Novel’ shaphang u Myllung Soso Tham.
