Shillong, Nohprah 18
U MDC shu sieh jong ka United Democratic Party (UDP), Bah Bindo M. Lanong u la shim ïa ka rai ban kyrshan noh ïa ka EC jong u Bah Pynïaid Sing Syiem kaba ïalam mynta hapoh Khasi Hills Autonomous District Council (KHADC).
“Ka la don ka jingïakren bad ka kynhun hapoh ka jingïalam u Bah Pynïaid Sing Syiem kum u CEM. Ka la don ka jingïasyllok bad ki bad nga la rai ba ngan phah shithi lashai ba ngan ai noh ka jingkyrshan jong nga (ym dei ba nga don shano-shano) sha kane ka kynhun synshar hapoh KHADC kaba ïalam ïa ka EC ba mynta,” la ong u Bah Lanong haba kren sha ki lad pathai khubor ha ka Lah Sngi U Blei.
Ka daw kaba la pynlong ïa utei u MDC shu sieh ban shim ïa katei ka rai ka dei namar ka jingkynnoh bym kheiñ briew shuh jong ka seng ïa u watla u long uwei na ki nongseng uba ïadon bynta ban pynkha ïa ka UDP.
Haba pynkynmaw ïa ka jingbym ai tiket ka UDP ïa u (u trai seng) ban ïakhun ïa ka ilekshon ba dang shu dep sha ka ïingdorbar thawaiñ na Nongkrem, u la ong, “Nga la ïaleh kum u kyrtong shimet namaba ki ai tiket ïa u bym dei na ka UDP. Lada jia ba ki ai ïa u dkhot ka UDP, ngan jin da la shong ban ïarap.”
U la ïathuh ruh ba hashuwa, u la phah shithi sha ka seng ha u bnai Lber-Ïaïong, 2023, ban ïa klet noh ïa kaei kaba la dep bad ban sdang thymmai khlem ka jingbuhnud namarba u don jingmut ban ïakhun ïa ka ilekshon MP.
“Kaba nyngkong, ki khlem jubab ba ki la ïoh pdiang ne em…nga la ap hynrei kim jubab ne ai dak bad kim ong hi ba ki la ïoh pdiang ïa ka shithi,” u la ong da kaba bynrap ba ha u bnai Jylliew u la pynkynmaw biang halor katei ka shithi hynrei wat hadien katei, ka seng kam shym la phah jubab sha u.
Na ka liang u Bah Lanong u la ïathuh ba ha u Nailar, u la thoh shithi biang sha ka seng ba kan shim ïa ka shithi jong u (ba la phah hashuwa) ba u la weng noh bad ïa kane ruh ka seng kam shym jubab.
Ha kajuh ka por, u la pynpaw ka jinglyngngoh ba ha ka General Council ba dang shu dep, ka seng kam shym la khot satia ïa u ban ïadon bynta lang ha katei ka jingïalang.
“Kine ki long kiei-kiei ki jingïadei jong nga bad ka UDP. Haduh mynta nga dang sngew ba ka mynsiem jong nga kam shah bad ngam ju kyntiap seng naduh ba nga rung sha ka saiñ pyrthei ha u 1972,” u la ong.
“Kumba ka long mynta, nga shim ïalade namarba ki khlem khot shuh ïa nga ha ka General Council, nga shu shim noh imat ba ka shu sah sa tang ha ka mynsiem bad nga shu ñiew ïalade kum u briew u bym don shuh ha ka seng,” la ong utei u MDC.
Halor ka jingkren u President ka UDP ba u Bah Lanong u dang dei u dkhot ka UDP, u la ong, “Nga don tangba kam don shuh ka jingïakren.”
Shuh shuh u la ong, “Nga ñiew ïalade mynta kum u briew uba laitluid bad u bym lah shuh ban don badno-badno.”
