New Delhi, Nohprah 18 (UNI)
Hapdeng ka jingïakynad kaba jur jong ka liang synshar bad ka liang pyrshah halor ka jingïoh rung jong arngut ki briew ha Lok Sabha ha ka taïew ba la lah haduh ba ki la kynthih syndon sha ka lympung ba shong ki MP bad bret da ki tyndong pynmih tdem, u Lamphang bad Shongknor ka Lok Sabha bad Rajya Sabha ki la dep ban sospon haduh 92 ngut ki MP na ka liang pyrshah haduh mynta.
Tang ha ka shi sngi, kata, ha ka Lah Sngi U Blei, ki MP kiba la shah sospon na baroh artylli ki Ïingdorbar Thawaiñ ki long haduh 78 ngut.
Kitei ki MP ki la shah sospon haduh ba kut ka Dorbar Tlang kaba dang ïaid haduh mynta halor ka jingkynnoh ba ki la pynkheiñ ïa ki kyndon jong ka Ïingdorbar Thawaiñ.
Ha kane ka sngi, u Shongknor ka Rajya Sabha, u Jagdeep Dhankhar, u la sospon ïa 45 ngut ki MP ba kynthup ïa ki nongïalam ka Congress kum u KC Venugopal bad u Jairam Ramesh. Kine kim lah shuh ban ïashim bynta ha ka Dorbar Tlang na ka daw ba ki la leh huri-hura bad pynkheiñ ïa ki kyndon.
Ha kane kajuh ka sngi, u Lamphang ka Lok Sabha, u Om Birla, u la sospon haduh 33 ngut ki MP halor ka jingpynmih huri-hura ha Ïingdorbar.
Da kane ka jingshah sospon ki 78 ngut ki MP mynta ka sngi, baroh ki MP kiba la shah sospon ha kane ka Dorbar Tlang ki la kot sha ka 92 ngut.
Ha kajuh ka por, u Shongknor ka Rajya Sabha u la phah ïa ki kyrteng jong ki 11 ngut ki MP ka Rajya Sabha sha ka Committee on Privileges bad kine ki kynthup ïa u Jebi Mather Hisham, L. Hanumanthaiah, Neeraj Dangi, Rajmani Patel, Binoy Viswam bad u Kumar Ketkar.
Lah ban kdew ba ki MP ka liang pyrshah ha Lok Sabha bad Rajya Sabha ki la pyrshah ïa ka sorkar halor ka jingïoh rung jong arngut ki ‘riew paidbah sha Parliament bad kiba la pynkulmar da kaba bret da ki tyndong lyer ha Lok Sabha katba ka Dorbar ka dang ïaid. Kine ki MP ki la dawa ba dei ban weng shwa ïa kiwei pat ki mat ïakren ha ka Dorbar bad ban ïatai halor kane ka jingjia. Hynrei ïa kine ki jingdawa jong ki, la kyntait.
Haba kynthoh halor kane ka jingshah sospon, u MP ka Congress, u KC Venugopal, u la ong, “Ngi shim ïa kane kum ka burom namar ngi la shah sospon ha ka sorkar kaba synshar donbor. Hadien ba la shah sospon 47 ngut ki MP na Lok Sabha, ka BJP ka la sospon ruh ïa ki MP ka Rajya Sabha bad ki MP kiba la shah sospon baroh ki long 92 ngut.”
“Balei sospon tang 92 ngut? Balei ym sospon haduh 100 ngut syndon,” la ong u Venugopal ha ka rynsan ‘X’.
