Shillong, Nohprah 18
Ka Khun Hynñiewtrep National Awakening Movement (KHNAM) kam pat ïakren haba ïadei bad ka ilekshon MP na Shillong parliamentary konstitwensi.
Haba ïakren bad u Working President ka KHNAM, u Bah Thomas Passah u la ong ba ka seng kam pat ïakren haduh mynta hynrei kan peit thuh ïa ka jinglong jingman.
Haba kylli, la ki don ne em ki seng saiñ pyrthei kiba pan jingkyrshan lang na ka bynta ka ilekshon MP, u Bah Thomas u la ong ba um pat lah ban kren ei ei ïa kane hynrei lada ka don kum kata ka jingkhot, hap ban ïakren lang hapoh ka seng ban shim ïa ka rai.
Haba kylli, la ki don pat ne em kiba wan tyrwa ban long u ne ka kyrtong ban ïakhun ïa ka ilekshon MP, u Bah Thomas u la ong ba kane ruh um lah ban kren eiei namar lada don eiei hap ban ïakren hapoh ka seng hapdeng ki nongïalam.
Kum ban pynkynmaw ka KHNAM ka la pynïakhun ïa u ophisar IFS barim u Bah THS Bonney kum u kyrtong na Shillong parliamentary konstitwensi ha ka ilekshon Lok Sabha ha u snem 2019.
