Shillong, Nohprah 18
Ka jingpynkhuid shnong kaba shisien shisnem ka dang bteng hajan man la ki shnong khlem kano-kano ka jingkylla khamtam ban pynlong ïa ki nongshong shnong ban pynneh ïa ka khuid ka suba baroh shisnem.
Kumba ju long man u snem, ki shnong ha sor bad khapsor ki pynlong ka jingpynkhuid shnong ha kane ka aïom tlang khamtam hashwa ka Khristmas bad lehkmen Snem Thymmai bad lada bun eh, ka jingpynkhuid ka long ar sien shisnem.
Baroh shisnem, ki lynti ki syngkien ki dap da ki jaboh khamtam eh ki plastik kiba la shu bret pathar kat shaba lap da ki nongïaid lynti naduh ki khyllung khynnah bad ki rangbah ruh kumjuh.
Ki nala shnong bad ki rud surok ki lang da ki jaboh bad ki plastik ki sahkut baroh shisnem.
Ka jingpynkhuid shnong kaba shisien shisnem lehse ka shu ïarap ban wanrah jingkhuid tang katto-katne por, bad tang hadien khyndiat sngi ki lynti bad surok ki la jaboh biang da ki plastik.
Ha ki snem kiba mynshwa, ki nongshong shnong haba ki ïasnohkti ban pynkhuid shnong kamut ki pynkhuid da kaba phut ïa ki kynbat ki phlang bad mait ïa ki khlaw kiba kah ïa ki lynti ïaid. Hynrei mynta pat kaba hakhmat eh ban pynkhuid ka dei ka plastik kaba la lang bad sahkut khlem pyut shuh baroh shisnem.
Namarkata, kaba kongsan tam ka dei ka jingkitkhlieh jong baroh ki nongshong shnong ban hikai ïa ki khun ki kti na la ïing ban lehkhuid bad ban nym bret plastik ha lynti syngkien, bad kiwei kiwei ki jaboh kiba pynsniew dur ïa ki sawdong sawkun.
Lait na ki katto-katne ki shnong ha nongkyndong kiba shimkhia shisha haba ïadei bad ka khuid ka suba da kaba lehkhuid baroh shisnem, ka jingpynkhuid shnong ha man la ki dong bad ki shnong khamtam ha sor bad khapsor ka dei tang ka lehkhuid rongphong shisngi.
Ki sngi ki don 365 sngi shisnem, bad ka jingkwah ban lehkhuid ha shnong ha thaw ka dei tang shisngi. La sakhi ba ka jingkhuid ka ju don tang ha ka khyllipmat ba la dep pynkhuid shnong, hynrei hadien kata, bad ha kiwei ki sngi, ym don ba ñiewkor shuh ban lehkhuid bad ka jingbret pathar ïa ki plastik bad kiwei ki jaboh ka long biang kumjuh.
Kumta donkam ban don da ki hajar tylli ki shnong kum ka Mawlynnong bad kiwei ki shnong kiba ju pynneh ïa ka khuid ka suba ha shnong ha thaw.
Baroh la tip shai ba ka jinglehkhuid ka khring bha wat ïa ki nongjngohkai pyrthei, hynrei ym don ba patiaw ban leh ïa kane da la ka jong ka mon.
U Myntri Rangbahduh ka ri, u Narendra Modi u hap ban da kyntu ïa ki nongshong shnong ban lehkhuid bad u ju kyntu ruh wat ha ka jingkren jong u ha ka prokram Man ki Baat ka All India Radio.
Pynban, une u juh u briew uba ïalam ïa ka ri bad uba ju pyrta ïa kata ka Swachh Bharat ban nym bret pathar ïa ki jaboh jabaiñ, um pat nud ban ktah ïa ki karkhana kiba saiñ bad pynmih plastik namar ki plastik ki dang jyllei, bad jan baroh ki jingbam la song ha plastik.
Lano u Modi un pyrta shla ban khang noh ïa ki karkhana saiñ bad pynmih plastik?
