Shillong, Nohprah 19
U Bah Lambor Malngiang uba dei u MDC ka UDP na Nongkrem ha ka Sngi Ba-ar u la leit ban ai jingkyrshan ïa ka Executive Committee (EC) jong ka Khasi Hills Autonomous District Council (KHADC) ba la lamkhmat da ka National People’s Party (NPP).
Kane ka la wan tang hadien shi sngi jong ka jingleit ai jingkyrshan u MDC shu sieh Bah Bindo Lanong.
Ïa u Bah Lambor la pdiang sngewbha da u CEM ka KHADC u Bah Pynïaid S Syiem hapoh ka shlem treikam ha ka jingdon lang ki EM ka District Council.
Ka Executive Committee hapoh ka KHADC ka dei kaba la thaw da ka NPP bad Congress hapoh ka lama Khasi Hills Democratic Front (KHDF).
U Bah Lambor u la pynpaw ba ka jingleit ban ai jingkyrshan jong u ïa ka EC ka long halor ki kam kiba ka district council ka la lah ban trei hapoh ka jinglamkhmat u Bah Pynïaid.
U la ong ba kane ka jingkyrsan kam dei ba un ïasoh noh sha kano-kano ka seng hynrei ka long tang ban ïoh ka lad ban ai ka jingshakri bapura sha u paidbah lyngba ka jingdon bynta ha ka EC.
