Shillong, Nohprah 19
Ka Executive Member (EM) ba khmih ïa ka tnat Market jong ka Khasi Hills Autonomous District Council (KHADC) ka Kong Grace Mary Kharpuri ha ka Sngi Ba-ar ka la ïoh ban pyllait paidbah ïa ka trok kit ñiut kaba la aiti sha ka Hima Mylliem ha ïewdielang.
Kane ka trok kit ñiut kaba la pyllait ha kane ka sngi, ka dei kaba la mang lyngba ka 15th Finance Commission hapoh ka Tied Grand skhim jong u snem 2021-22.
Ha kane ka sngi pyllait ïa kane ka trok rit, la ïadonlang u Syiem ka Hima Mylliem u Pa’iem Ainam M Syiem, ki Myntri ka Hima Mylliem, u Deputy Secretary ka KHADC, ki nongshong ïew lem bad kiwei kiwei.
Haba ai jingkren ha ka jingïalang, ka Kong Grace ka la ong ba ka jingpyllait ïa kane ka trok ka long kum shi bynta na ka thong jong ka Executive Committee hapoh ka jingïalam u Bah Pynïaid S Syiem kum u CEM ban wanrah ka khuid ka suba ha Ïewduh, kaba long kawei na ki ïew kyntang bad kaba la bna nam ym tang hapoh ka jylla ne ha ri hynrei wat ha satlak ka pyrthei.
“Ngi kwah ban pynneh pynsah ïa ka nam ka Ïewduh, kum ka EM nga kwah ba ka nam kan sah junom bad ban ïoh ïa kane, ngi donkam ban sumar bad lehkhuid ïa ka. Nga kyrpad ïa u Syiem bad ki Myntri ka Hima Mylliem ban shimkhia lem namar ka jingkhuid ka dei kaba kongsan, bad kyrpad ruh ïa ki nongshong ïew bad nongleit ïew ban sumar lem,” la ong ka Kong Grace.
“Haba phi lehkhuid ha la ki ïing, phi dei ruh ban shim ïa ka Ïewduh kum la ka jong ka ïing ban sumar bad leh khuid ym ban lehsih kumba ka paw mynta. Nga buh ka jingkyrpad ba na ka bynta ban kyntiew ïa ka burom bad ka ijot jong kane ka ïew, ngim dei ban bret pathar ïa ki jaboh kat shaba lap,” ka la ong.
“Nga sngew lehraiñ haba nga leit sha Motphran bad ki bahaïing, haba la ïohi ïa ka dusbin kaba la dap tang da ka jaboh bad kaba long isaitmet bha. Ngi la wan jurip na ka por sha ka por bad la bthah ban weng noh namar ba jaboh palat hynrei ym pat lah haduh mynta ban weng,” ka la ong.
Katba na ka liang u Syiem ka Hima Mylliem haba pynpaw ka jingkmen, u la sngewnguh ïa ka KHADC kaba la phai khmat lem sha kane ka ïew, da kaba aiti ïa kane ka trok bad pynkynmaw ruh ba dang ha kine ki khyndiat bnai ba la leit, la dep ruh ban aiti kawei ka trok kit ñiut, kaba long shisha ka jingsynñiang kaba paka ban ïaleh ban wanrah ïa ka khuid ka suba hapoh ka ïew.
