Nongstoiñ, Nohprah 19
Uwei u khynnah ba dang 9 snem ka rta, u la jah na la ïing naduh ka 4 tarik mynta u bnai bad kat haduh mynta ym shym la tip shano u don ne leit.
Ha ka kyrwoh khubor ba la phah da u Superintendent of Police ka West Khasi Hills District u la ong ba u Min Bhadur Thapa uba na ka shnong Shallang Songsak, West Khasi Hills District u la ai ïa ka jingujor ba u khun jong u, u Durmur Thapa ba dang 9 snem ka rta u la jah na la ïing naduh ka 4 tarik u Nohprah, 2023 bad la ïohi khatduh ha Joplang Higher Secondary School Shallang bad kat haduh mynta ym pat ïoh jingtip eiei shano ba u la jah.
Shuh shuh ka kyrwoh na u SP ka ong ruh ba u Durmur Thapa u don ïa ka dur kaba shai snieh doh, u don ïa ka rynïeng kumba 48 inshi, phong ka jaket rong byrthup (grey), ka patlun lyngkot ba ïong bad ki slipar rong ïong bad lieh ha ka por ba u la jah.
Kumta, na ka liang u SP u la kyntu ïa kino kino kiba lap lane ïohi ba kin sngewbha ban pyntip sha ki pulit.
