Shillong, Nohprah 19
Ki nongtrei Casual bad Work Charge ka tnad PHE Mawphlang Area lyngba ka Mawphlang PHE Worker’s Union (MPWU) ki la mih shakhmat lyngba ki lad pathai khubor ban dawa na ki bor ba halor ka tnad ban pyllait noh ïa ka tulop jong ki kaba la shah set la kumba katto-katne bnai eiei.
Katkum ka jingïathuh jong ka Union la ong ba ka la dep ban phah da ka shithi ha ki bnai ba la dep sha u Executive Engineer jong artylli ki Division kiba hap hapoh ka Mawphlang PHE sha u Myntri ba dei khmih ïa ka tnad PHE bad kumjuh ruh sha kiwei pat kiba dei khmih bad la pyllait ïa ka tulop jong shibnai kata u Nailur. Hynrei kumba la ïathuh da ka Union, ka tulop jong ki nongtrei Casual bad kiba trei sngi ka dang sahkut bad kumta ki la kyrpad ïa kiba dei khmih ba ki dei ban pyllait noh ïa ka tulop jong ki kata naduh u Risaw bad Naiwieng bad kumjuh ruh ban pyllait noh ïa ka pisa kaba dei kum ka jingai sngewbha khristmas.
Haba kren sha ki lad pathai khubor, u Bah Napoleon S Mawphlang, President ka Union u la ong ba ka jingwan mih shakhmat jong ki nongkitkam bad ki dkhot ka EC jong ka Mawphlang PHE Worker’s Union ka long halor ka nongrim ba ha ki bnai ba la dep, na ka liang ki nongtrei PHE kiba kynthup ïa ki nongtrei Casual bad ki Work Charge ki la shah set tulop.
U Bah Mawphlang u la ïathuh ba ha ki bnai ba la dep, na ka liang jong ka Union ka la leit mih sha ki bor ba halor ban kyrpad ïa ki ban pyllait noh ïa ka tulop kaba sahkut kaba dei hok jong ki.
U la ïathuh ba na ka liang ka Union ka la dep ban phah da ka shithi ha ka 22 tarik u Naiwieng 2023 ha u Executive Engineer jong baroh artylli ki Division hapoh ka Mawphlang Area jong ka Mawphlang jong ka tnad PHE.
Shuh shuh u la ïathuh ba ha ka 24 tarik u Naiwieng 2023 ruh, ka Union ka la phah da ka shithi sha u Myntri ka sorkar jylla ba dei khmih ïa ka tnad PHE bad kumjuh ka Union ka la phah ruh ïa ka shithi sha u Deputy Secretary ka tnad PHE bad sha u Commissioner Secretary ka tnad PHE bad sha u Deputy Labour Commissioner jong ka District Labour Office ka East Khasi Hills.
“Hadien ba ngi la phah ïa ki shithi sha ki bor ba halor, na ka liang jong ki bor ba halor ki pyllait ïa ka tulop kaba shibnai kata jong u Nailur”, la ong u Bah Mawphlang.
U la ong ba na ka liang jong ka Union ka kyrpad ban siew dep noh ïa ka tulop kaba dang sah jong ki nongtrei Casual ne ki Muster Roll bad ki Work Charge kiba hap hapoh ka PHE Mawphlang.
“Ki bor ba halor kin sngewbha ban pyllait lem ïa ka tulop kaba sah jong u bnai Risaw bad Naiwieng kumjuh ruh ban pyllait lem ïa ka jingai sngewbha khristmas jong mynta u snem”, la ong u Bah Mawphlang.
U la ong ba ka Union kam banse ban mih shakhmat lyngba ki lad pathai khubor namar ba ka aïom lehkmen Khristmas ka lajan bad kumta ki nongtrei Casual bad ki Work Charge ki dei kiba trei mynsngi bad kiba bam mynmiet bad ka jingïoh jong ki ruh ka dei kaba rit.
“Ka jingïoh jong ki kaba rit bad mynta ka la sahkut da ki bnai ki bnai bad kane ka la ktah bha ïa ka jingim jong ki kaba manla ka sngi khamtam ba mynta lei ka la dei ka por Khristmas bad ka jingrakhe Snem Thymmai, kumta halor kane ka nongrim, na ka liang jong ngi, ngi kyrpad ïa ki bor ba halor ban pyllait noh ïa ka tulop jong ki Muster Roll bad ki Work Charge kaba dei jong u bnai Risaw bad Naiwieng ha ryngkat bad ka jingai sngewbha Khrismas kaba ju ai manla u snem”, la ong u Bah Mawphlang.
U la ong ruh ba ka Union ka kyrpad ïa ki bor ba halor ban pyllait lem ruh ïa ka Variable Dearness Allowance (VDA) jong ki nongtrei.
U la ïathuh ba ki don palat shihajar ngut ki nongtrei tang jong ka Mawphlang Area kiba mad jingeh bad kane kam dei ka sien banyngkong ba ki sahkut tulop hynrei ka ju jia na ka por sha ka por.
U la ïathuh ba na ka liang jong ki bor ba halor ki la ong ba kin sa ïaleh ban pyllait noh ïa ka tulop shwa ka Khristmas hynrei kim pat lah satia ban ai kano-kano ka jingkular bad kumta na ka liang ka Union kan sa leit ban mih biang sha ki bor ba halor ha kine ki sngi ban wan.
