Shillong, Nohprah 19
Wat la u Bah Mattiphrangki Nonglamin, 33 snem, uba dei na Pynursla bad kum u shakri sorkar hynrei u la mih shakhmat ban ïakob tainia halor ka phang “Ka jingaijait kpa ki katto katne ki khun ka bri u hynñiewtrep ka pyntroiñ ïa ka jaidbynriew” namar u kwah ban pynneh beit ban ai jait sha ka kmie kaba pun ba kha kumba la leh da ki longshwa.
Ha kane ka jingïakob pyni nia ba la pynlong da ka Hynñiewtrep Youths’ Council (HYC) lyngba ka tnad Socio & Cultural, u Bah Mattiphangki Nonglamin u la wan ha ka kyrdan kaba nyngkong bad rah ïa ka song pisa kaba T.10,000 (shiphew hajar tyngka) ryngkat ka syrnod.
Ïa ki nongjop ha kane ka tainia ba pynlong da ka HYC la sam khusnam ha ka sngi buh syntiew ïa u Myllung Soso Tham ha phyllaw ka State Central Library Shillong kaba la long ha ka 18 tarik mynta u Nohprah ha ka jingïadonlang u President ka HYC Sengkmie Bah Roykupar Synrem bad ki dkhot ka HYC.
U Bah Mattiphrangki u la ong ba lada pynkylla noh ïa ka jingai jait sha u kpa kan wanrah ïa ka shong sang bad kan ym don shuh ka kheiñ kur bad kheiñ kha.
U la ong ba kan pynkulmar shuh shuh ka dei ka rukom bat khyndew namar ïa mynta ki bat beit kiba ai jait sha ka kmie, te lada mih sa kiba ai jait sha u kpa kan mih ar kynhun.
Katba ka Kong Aidalis Rani ba shong ba sah ha Mawnianglah, Upper Shillong, kaba dei shnong trai na Madanbitaw ka la ong ba wat la ki kynthei Khasi ki kit khunrei namar ba ai jait sha ka kmie hynrei ym pat ju ïohi ba ka kynthei Khasi bad ki khun ban leit shong khrong ha lynti syngkien. Pynban kum ka kmie ka trei shitom ban pyndap pynbiang hynrei ka la pynpaw ba ki don shibun ki kynthei kiba ai jait sha u kpa tang shu shah ieh ha u lok ki hap ban leit khrong ha lynti syngkien.
Ka Kong Rani ha kane ka tainia ka la ïoh rah ïa ka kyrdan ba ar ryngkat ka song pisa kaba T.7,000 (hynñiew hajar tyngka) bad ka synod.
Nalor nangta ka la ïathuh ba ka la don khun saw ngut tang ki shynrang suda, hynrei kam shym la pynshlur ïa ki khun ba kin shim jait halade hynrei ki dei ban ai jait sha ka kmie.
Ka la ai jingmut ba ha jaka ban ai jait sha u kpa dei ban pynkylla noh ïa ka rukom pyrkhat ba ïa ki khun shynrang ruh ki kmie ki kpa ki dei ban ai bynta lang khlem da ñiew shiliang khnang ba ka jingai jait sha ka kmie kan neh beit kumba buh u mynbarim.
