Shillong, Nohprah 19
Ka Kynhun Myntri ka Sorkar Jylla ka la ai jingmynjur ban shu aiwai snem (lease) ïa ka jaka sha ki longïing kiba kyntur bad shu sah kumto ha ka jaka jong ka Sorkar kaba don ha nongbah Tura kum ka lad ban pynbeit ïa ka jingeh kaba la neh kum ka jingïakajia mynta la bun phew snem.
Haba kren sha ki lad pathai khubor hadien ka jingïalang jong ka Kynhun Myntri ha ka Sngi Ba-ar, u Myntri Rangbah Conrad K Sangma u la ong ba ki jaka Sorkar ha Tura ki dei kiba la sahteng la bun phew snem ha kaba la don kiba sah da kaba rung sha ka jaka jong ka Sorkar.
U la ong ba ka Sorkar ka la lah ban pynbeit ïa kane da kaba shim ïa kane ka sienjam namar ki don katto-katne ki jaka jong ka Sorkar kum ha Dakopgre, Walbakgre bad hajan kaTura Civil Hospital kiba la long ki jingïakajia na ka por sha ka por bad khlem lah ban pynbeit mynta la bun phew snem.
Kumta ka Kynhun Myntri ka la ai jingmynjur bad bthah ïa u Deputy Commissioner ka West Garo Hills ban ai lut ki jingtip kiba bniah naduh ka jingdon ki longïing kiba shong ba sah, ka jingheh ka jaka bad ki sngi ki tarik ba ki wan kyntur sha ka jaka Sorkar.
U Myntri Rangbah u la ong ba kane ka jingpynbeit kan ïarap ban weng ïa ka jingeh namar ka Sorkar ka long trai ïa ka jaka lajong bad ki briew ba shong ba sah ki wai snem ïa ka jaka.
Kumta u la ong ba kine kiba sah kin ïoh ka kynja syrnot kaba pyni ba aiwai snem bad ka jinglong trai ka neh ka sah bad ka Sorkar hi kumba ju long.
U la ong ba kiba shong ba sah ynda ki la don ka kynja syrnot ki lah ban shim ram ruh na ki bank.
Ha kawei pat ka liang, u Myntri Rangbah u la ong ba lada donkam jaka ban pynïar ïa ki kam pynroi ka Sorkar ka lah beit ban shim jaka ha kine ki jaka.
