Shillong, Nohprah 19
Ka Regional Democratic Alliance (RDA) ba kynthup ïa ka HSPDP bad ka UDP ha ka Sngi Ba-ar ka la pynbna ïa ka kyrteng jong u Bah Robertjune Kharjahrin kum u kyrtong u ban ïa aireng ha kane ka ilekshon MP ban wan na Shillong Parliamentary konstitwensi.
“Ngi sngewkmen ban ïathuh ïa phi hangne ba ha ka jingïakren bad jingïatai na bynta u kyrtong jong ka RDA, kiei-kiei baroh ki wan dur – tang kawei beit ka kyrteng…bad kata ka dei jong u Bah Robertjune Kharjahrin,” la ong u Chairman ka RDA, Bah Metbah Lyngdoh haba kren sha ki lad pathai khubor hadien ka jingïalang ka RDA.
U la ïathuh ba ha ka jingïakren, baroh 2 tylli ki seng hapoh ka RDA, ki la shim ïa ka rai ban jied bad pynbna ïa ka kyrteng jong utei u rangbah kum u kyrtong ka RDA na bynta ka ilekshon MP ban wan sha ka Lok Sabha na Shillong Parliamentary konstitwensi.
U Bah Lyngdoh u la ong ruh ba ka jingwan dur jong ka kyrteng u kyrtong ka RDA ka long kaei-kaei kaba pyni ïa ka dak jong ka jingïatylli jong ki 2 tylli ki seng saiñ pyrthei, ha kajuh ka por ka rukom pyrkhat pyrdaiñ kaba kum ka RDA ka don na bynta ka ilekshon MP.
Ha kajuh ka por, ka jingïalang ka la rai ba ka shap na bynta kane ka ilekshon ban wan kan dei ka shap jong ka ‘Bom’.
Nalor katei, u Chairman u la pynsngew ba ka jingïalang ka la shim ruh ïa ka rai ba ka jingïatreilang kan dei na bynta ka ilekshon MP bad MDC kumjuh.
“Haba ïadei bad ki mat jong ka ilekshon MDC, ngin sa nang bun ki jingïalang ban ïathir na bynta ka jingbit jingbiang jong ka RDA bad ki konstitwensi bapher-bapher,” u la ong.
Haba kylli, u la bynrap, “Ha ka ilekshon MP ba la dep, lehse ka don ka jingïatrei ryngkat haba ïadei bad ka jingpynïeng ïa u kyrtong ka UDP ha kaba la kyrshan da kiwei ki seng saiñ pyrthei khamtam ka NPP. Hynrei ha kane ka khyllipmat ba mynta, ka jingwandur jong ka saiñ pyrthei ka long ba kumba ngi ju ïadon barabor kum ka RDA naduh ki por, ki snem ba la leit noh, ngi sngewdei ban pynskhem ïa ka bad trei ryngkat na ka liang ka HSPDP bad ka UDP.”
