Shillong, Nohprah 19
U President ka United Democratic Party (UDP), Bah Metbah Lyngdoh u la ong ba ka seng kam don eiei pyrshah ïa u MDC shu sieh (jong ka), Bah Bindo M. Lanong bad kan ïai bteng ban burom ïa une u rangbah uba la slem bha ha ka kam saiñ pyrthei.
Halor ka jingkynnoh bym kheiñ snep jong ka UDP ïa u Bah Bindo wat hadien ba u la thoh 2 tylli ki shithi ban pynpaw ïa ka jingkwah jong u ban ïakhun ïa ka ilekshon MP, u Bah Lyngdoh u la ong, “Na ka liang ka seng ngam kwah ban ong eiei haba ïadei bad ka kam jong i Bah Bindo.”
U la ong ba haduh mynta, ka seng ka pynpaw ïa ka jingburom ïa u kum uwei na ki ‘riew rangbah uba la don la slem ha ka kam saiñ pyrthei.
“Nga tharai ngin pyrkhat sani haba ïadei bad kane ka jingburom. Na ka liang jong ngi kum ka seng ngi burom ïa i kum uwei na ki ‘riew rangbah ha kaba i long mynta kum u MDC shu sieh hangtai (KHADC) lyngba ka UDP,” u la ong.
Haba kylli, u la kam ba ka seng na ka por sha ka por ka ju pyrshang ban ïakren bad u Bah Bindo ha ki kyrdan bapher-bapher.
“Na ka liang ka seng ngim don eiei hynrei ngi kloi ban ïakren lada ka donkam,” la ong u Bah Lyngdoh.
Haba kylli la ka UDP ka jem than ban leh ïa utei u MDC uba la ïakhun pyrshah ïa u kyrtong ka seng na Nongkrem ha ka ilekshon ba dang shu dep sha ka ïingdorbar thawaiñ, u President u la ong ba haba ïadei bad katei ka bynta, ki don bun bah kiei-kiei kiba hap ban pyrkhat sani bha.
“Kumba ngi la ong…ba na ka liang jong ngi kum ka seng, ngi don ka jingburom ïa i haduh mynta bad ngim kwah ban ai kano-kano ka jingkynthoh kaba long pyrshah ïa i namar ngim don hi ruh kaba kum kata,” u la ong.
Ha kawei ka liang, halor ka jingleit ai jingkyrshan jong ki 2 ngut ki MDC ka seng (Bah Lambor Malngiang bad Bah Bindo M. Lanong) ïa ka EC hapoh ka jingïalam u Bah Pynïaid Sing Syiem (kum u CEM) ha KHADC, u Bah Lyngdoh u la ong ba um don jingtip eiei halor katei bad u shu ïohi ha ki lad pathai khubor.
Shuh shuh u la bynrap, “Ngi la aiti ïa kane sha ki MDC jong ka seng ba ki khmih bniah ïa kane ka kam jong ki 2 ngut ki MDC.”
