Shillong, Nohprah 19
U CEM ka KHADC Bah Pynïaid Sing Syiem u la ong ba ka KHADC kan nym ithuh ïa ki Society bad kumta ka RR Colony kan hap hapoh ka jingpeit jong u Rangbah Shnong Rynjah namar ka KHADC ka hap ban bud ryntih ïa ki rukom treikam u mynbarim.
U la kren shai ba ka KHADC bad ki dorbar shnong kin nym ai laisen khaïi ïa kito ki bar jylla kiba dang shu wan buhai shnong hapoh ka jylla hynrei kan ai laisen tang ïa ki bar jylla kiba la shong la slem hapoh ka jylla.
Ïa kine ki kyntien u la pynpaw haba kren kum u Kongsan haba aiti ïa ka trok kit ñiut kaba la mang pisa haduh T.23 lak na ka skhim Chief Minister Special Development Fund 2022-23 kaba la long ha ka 18 tarik mynta u Nohprah ha ïew Rynjah.
U Bah Pynïaid u la ong ba ki bar jylla kiba sah ha RR Colony kin hap hapoh ka jingpeit ka Dorbar Shnong Rynjah namar katkum ka aiñ jong ka district council ym shym la ithuh ïa ki synjuk ban long nongïalam shnong hynrei tang ïa ki rangbah shnong ba la ai sanad da u Syiem.
U la ong ba wat la ka RR Colony ka hap hapoh jingpeit ka shnong Rynjah hynrei kin nym lehbeiñ ne kyntait ïa ki hynrei kin ïatreilang, hynrei tang kawei kito kiba dang shu wan thymmai ka shnong bad ka KHADC kan nym lah ban ai laisen khaïi lait noh kiba la sah slem ki don ka hok ban ïoh laisen khaïi.
Namar kata, u kyrmen ba kane ka trok kaba u la aiti kan wanrah ïa ka jingkhuid jingsuba ha shnong ha thaw bad ïa ka imlang ka sahlang.
U la ïathuh ba u la dep mang T.10 lak ban pynheh ïa ka ïingdorbar shnong Rynjah hynrei la sngewthuh ba kin nym lah ban pyndep, kumta u la ïathuh ba un ai biang sa T.20 lak ban pyndep ïa ka ïingdorbar.
