Jowai, Nohprah 19
Ka shnong Lapangap dang shen ka dang shu dep mad ïa ka jingkthang mynsiem na ka jingshah pyndik ha ki Karbi ha ki khyndiat bnai ba la dep bad mynta sa shisien biang ka la hap ban mad biang ïa ka jingshah pynthut ha ki pulit Assam.
Mynta ka kynti, ki pulit Assam kumba ki ju leh man u snem ki la pynthut biang ïa ka jingmaramot ïa ka surok khyndew da ki nongshong shnong ka Lapangap.
Kitei ki nongshong shnong ki la mih paidbah ha ka 19 tarik Nohprah ban maramot ïa ka surok ktieh khnang ban pynsuk ka leit ka wan ha kane ka jingleh kmen Khristmas bad ruh na ka bynta ki ar tylli ki jingïaseng heh ban long ha Lapangap.
Ki nongshong shnong ki la maramot ïa katei surok da kaba pyndap khyndew bad maw naduh na shnong Lapangap shaduh Khanduli.
Hynrei katei ka jingthmu ba bha ka jong ki, ka la shah pynthut noh ha ki pulit jong ka Assam na ka daw ba ka dang dei ka jaka ïakajia khappud.
Haba ïakren bad u Waheh Shnong ka Lapangap u Bah Deimonmi Lyngdoh u la ong, watla shah pynthut ha ki pulit jong ka Assam hynrei ka jingtrei ban pynbha ïa ka surok khyndew ka long kaba ïaid beit ïaid ryntih bad ka jingtrei ka la poi shakhmat ka shnong Langkeroi.
U la ïathuh ba ki pulit jong ka Assam kiba wan ar kali, ki la wan ban pynsangeh ïa ka jingtrei ha ka por kumba 2 baje nohphai sngi eiei.
U Bah Deimonmi u la ïathuh ba na ka liang ki bor pynïaid district ki la ïakren bad ki nongïalam shnong jong ka Lapangap ban pynsangeh noh ïa ka jingtrei khnang ba kan ym wanrah kano-kano ka huri-hura bad na ka liang u Waheh Shnong ruh u la pynsangeh noh ïa ki nongshong shnong artad ba la jan kem dum ka suiñ bneng.
