Shillong, Nohprah 19
Hadien ka jingbym lah ban pynkhie im biang ïa ka karkhana Mawmluh Cherra Cement Limited (MCCL) wat hadien ba la dep ban theh palat T.300 klur eiei ha kine ki 15 tylli ki snem ba la leit, ka Sorkar Jylla kam banse shuh ban shim da ka rai ban sa khang khyrdep noh ïa ka MCCL.
Kumta ka jingap khmih lynti ki paidbah khamtam ka shnong Mawmluh bad ka thaiñ Sohra ban pynkhie im biang ïa ka karkhana pynmih dewbilat ka MCCL ka la kut syndon namar ba ka sorkar kan khang khyrdep noh ïa ka.
Ïa kane la pyntip da u Myntri Rangbah ka Jylla u Conrad K Sangma haba kren sha ki lad pathai khubor ha ka Sngi Ba-ar, ha kaba u la ong, ba ka Sorkar hadien ba ka la dep ban wad ki lad ki lynti hynrei kam sngewlah shuh ban kyrda ban pynïaid ïa ka na ka daw ba ka jingkynshew pisa ka heh palat nalor ba la dep ban kynshew lypa ïa T.300 klur ha kine ki 15 snem ba la leit.
U Conrad u la ong ba ka sorkar kan ai khublei kti khatduh noh bad ki nongtrei ka MCCL da kata ka skhim Golden Handshake ne ka VRS, ha kaba ka sorkar kan siew ïa baroh ki nongtrei ryngkat ka skhim kyrpang khnang ban khang noh ïa kane ka karkhana, hadien ba ka sorkar ka la kut ki buit ki lad ban pynkhie im biang ïa ka.
U la pyntip ruh ba ïa kane ka rai ban khang khyrdep yn sa shim shen naba mynta ka dang ïaid ka jingpynkhreh.
Ka MCCL ka la don 57 snem eiei naduh ba la seng ha ka por ka sorkar Assam bad mynta ka jingpynpra ïa ki tiar rim jong kane ka karkhana ka la ïaid shaid-shaid.
“Ngi la pyrshang katba lah ban pynkhie im ïa ka MCCL hynrei namar ki jingeh kiba bun kiba la mih, ka Sorkar kam shym lah shuh ban pynïaid shakhmat, kumta ka long kaba donkam ban shim rai ban ïaid tang ha kawei ka lynti bad kumta ngi la sngew ban shim ïa ka rai ha ryngkat ki kynhun bapher bapher, ba ngin khang khyrdep noh ïa ka hynrei ngin leh ïa kane hadien ka jingïasyllok bad ki kynhun bapher bapher haba ïadei bad ki kyndon,” la ong u Myntri Rangbah.
U la ong pat ba ka Sorkar kam pat raikut ïa kane ka rai bad ka dang pynkhreh mynta ïa ki kyndon ha kaban khangdam noh ïa ka MCCL.
Haba kylli halor ka rai ba la shim ban pynkhie im ïa ka MCCL da ka Joint Venture bad ki kompani shimet, u Myntri Rangbah u la ong, “Ngi kwah ban leh ïa ka Joint Venture hynrei sngewsih ba ngim shym la ïoh ïa ki jubab kiba sngewtynnad.”
U la pynkynmaw ba kum ka sorkar ka la buh lai tylli ki lynti, kata ba ka Sorkar kan pynlut haduh T.150 klur kaba long kaba eh bha ban leh, kaba ar ban leh da ka joint venture hynrei ki katto-katne ki kompeni kiba wan shakhmat, kim shym la biang ne ki ban lah ban leh hok ïa ka kam bad ka lynti balai ka dei ka rai lang bad ki kynhun bapher bapher ban khang khyrdep noh ïa ka MCCL lada kut kine ki artylli ki lad.
