Shillong, Nohprah 20
U Myntri Rangbah ka Jylla Conrad K Sangma u la ai khublei Khristmas ïa ki 55 hajar ngut ki nongtrei Sorkar da ka jingpynbna ban pyllait noh kloi ïa ka tulop jong u bnai Nohprah bad kumjuh ruh ka jingai mynjur ban pynkiew noh da 3% ïa ka Dearness Allowance (DA).
Kum ki nongtrei sorkar kin ïoh lehkmen ïa ka Khristmas bad Snem Thymmai ha ka rukom kaba dei, u Lat ka Jylla u la shim ïa ka rai ban pynkiew noh ïa ka Dearness Allowance (DA) bad Dearness Relief (DR) kaba dei ban siew sha baroh ki nongtrei Sorkar, ki nongtrei ba la shongthait bad ki longïing kiba ïoh ïa ka baibam tymmen.
Ha ka jingpynbna kaba la pynmih, ka jingpynkiew ïa ka DA da 3%, kata ka long na ka 36% sha ka 39% bad kane ka jingpynkyniew kan treikam naduh ka 1 tarik u Naitung, 2023.
Kane ka jingbthah kan treikam sha baroh ki dkhot jong ki Work-Charge bad ki nongtrei Casual lait noh ki Bungalow Person, kiba bat ïa ka kyrdan kiba hap hapoh ka Applicable pay level kaba ïaryngkat bad ki nongtrei jong kane kajuh ka kyrdan kiba hap hapoh ka regular establishment, services lane post.
Ka memo la ong ruh ba “ka Dearness Relief ba la kdew ha kane ka jingbthah kan ym treikam shipor (sospon) lada ki nongtrei ba la shongthait ne ki longïing jong ki nongtrei ba la shongthait ki la ïoh kam biang hapoh ka State/Central Government lane la thungkam biang ïa ki hapoh ka State/Central Government Company, Corporation, Undertaking, lane Autonomous Body. Kane ka jingpynsangeh treikam ïa ka hukum kan kut noh hadien ba kane ka jingaikam biang ïa kine ki briew ka la kut noh”.
