Bengaluru, Nohprah 20
Ki samla napoh ka jylla Meghalaya kim dei shuh kiba dang sahdien hynrei ki long kiba la nang la stad bha ha ka jingpule. Ki la don ïa ki kyrdan kiba kham shalor hynrei kaba sngewsih pat ka long ba kine ki samla watla ki la pyndep ïa ka jingpule na ki jaka pule bapher bapher kiba don hapoh ka jylla ne shabar jong ka jylla ruh kumjuh kim ïoh satia ïa ka kam ka jam kaba biang. Nangta ki don ruh pat kiba la hap ban shu shong ïing khlem kam khlem jam namar ka jingkyrduh kam shaba palat hapoh ka jylla.
Watla kane ka la pynsngewsih bad pynsngewdiaw shikatdei eh ïa ki samla ka jylla kiba la nang la stad hynrei kane ka jingbym ïoh kam hapoh ka jylla ka khlem khanglad satia ïa ki ba kin pyiar ïa la ki thapniang ban jam sha kawei pat ka lynti bad kata ka long ban mih napoh ka jylla lade bad ban trei sha kiwei pat ki jylla ha ki jaka bad ki shlem treikam bapher bapher.
Ka ju don ka jingong kaba ong, “Haba ngi lah ban phohsniew ïa ki jingthrang ki jong ngi, ngi lah ruh ban ïoh ïa ki”, bad kane ka jingong ka la pynlong ïa ki samla ba kin thom ïa ka lynti kaba eh bad ban poi sha kliar ka jingjop la ka long ha kano kano ka jaka.
Ka long kaei-kaei kaba sngewsarong bad kaba sngewtynnad ban ïohi ïa la ki paradoh parasnam ba ki la kiew shaphrang ha baroh ki liang ha ka jingim jong ki ha kaba ki la poi ban trei ban ktah ha kiba bun ki jaka bad ki jylla jong ka ri India bad wat shaduh shabar ka ri ruh kumjuh.
Lyngba kane ka khubor kan ai mynsiem shikatdei eh ïa ki para samla ka jylla ba kin ïai minot thop bad ba kin ïai bud ïa ki jingphohsniew ki jong ki lyngba ka nuksa bad ka jingtrei shitom jong kine ki arngut ki samla Khasi napoh ka jylla kiba la trei la ktah da ki snem shapoh ka nongbah kaba heh bha kata hapoh Bangalore.
Na ka liang U Nongsaiñ Hima, u la ïoh ban ïakynduh bad ïakren bad ki Khasi kiba shong ba sah bad kiba trei ba ktah ha nongbah Bangalore da ki snem mynta ha ka por ba ki la wan ban sakhi bad ban thied ïa u sohniamtra bad kiwei kiwei ki mar ki mata kiba la die bad pyninam hapoh ka tamasa Zest Fest Meghalaya Khasi Mandarin kaba la sdang naduh ka sngi Palei kata ka 14 haduh ka 17 tarik u bnai Nohprah 2023 hapoh ka nongbah Bengaluru.
Haba ïoh ban ïakren bad u Bah Molden Jyrwa u la ïathuh ba u la shong la sah ryngkat ka ïing ka sem jong u mynta la 20 snem hapoh Bengaluru bad u la trei la ktah hapoh ka Tata Capital.
U Bah Jyrwa u la ïathuh ba ka shnong trai kaba u la heh la san bad pyndep ïa ki jingpule ka dei napoh ka shnong Mairang. Hadien ba la pyndep ïa ki jingpule na Mairang, u la wan noh sha Bangalore ban trei ban ktah.
U Bah Jyrwa u la ïathuh ba u la poi sha katei ïew pyninam ne ka tamasa sohniamtra ka dei lyngba ki paralok kiba la phah sha u ïa ka prokram jong katei ka tamasa. Kumta u la wan poi ha katei ka tamasa namar ba u kwah ban thied ïa u sohniamtra Khasi uba la pynmih napoh ka jylla.
U Bah Jyrwa u la pynpaw ka jingsngewsarong bad ka jingsngewkmen kaba khraw ban ïohi ïa la ki paradoh ki parasnam napoh ka jylla ba kin wan ban die ïa ki sohniamtra bad kiwei kiwei ki mar mata jong ki ha katei ka rynsan kaba la pynlong da ka sorkar jylla bad kane ka ai jingïarap shikat dei eh ïa kiwei kiwei ki jaitbynriew na kiwei kiwei ki jylla ba kin ïoh jingtip shaphang u sohniamtra Khasi bad kiwei kiwei ki mar rep ba la pynmih napoh ka jylla Meghalaya.
U Bah Jyrwa u la ong ba kiba bun ki khynnah samla napoh ka jylla Meghalaya ki don shapoh Bangalore kiba la trei la ktah ha ki shlem treikam bapher bapher bad ha ki kyrdan ba kham shajrong ruh kumjuh.
U Bah Jyrwa u la ïathuh ba haba ki ju ïakynduh ïa ki paradoh parasnam ha KJCLF, ki ju poi ïakren bad ïa kylli halor ka jingwan jong kitei ki paradoh parasnam shapoh Bangalore bad kitei ki paradoh parasnam ki ong ba ki wan ban pule bad ynda ki la pyndep ïa ka jingpule kin sa wad ïa ki kam ki jam bapher bapher.
Shuh shuh u Bah Jyrwa u la ong ba ha kaba ïadei bad ka jingplie lad jingplie lynti ka Bangalore ha ka liang ka kam ka jam bad ki kyrdan jingpule bapher bapher, ka Bangalore ka dei kawei na ki nongbah kaba la kiew shaphrang kaba plie shibun ki lad ki lynti.
U Bah Jyrwa u la mynsiem ïa ki paradoh parasnam ba lada ki don ha kano kano ka jaka la ka long ha Bangalore ne hapoh ka jylla lajong bad lada ki trei ki ktah ne ki pule, ka dei tang ka jingtrei shitom bad ka jingthrang jong ki kaba lah ban ïalam ïa ki sha ka thong hynrei lada ngim trei shitom hi, ngin nym lah ban kheit ne ïoh ïa u soh u ba bha.
“Ha kano kano ka jaka ne ka jingtrei ne ka jingpule jong phi ka dei ka jingtrei shitom bad ka jingthrang jong phi kaba lah ban ïalam ïaphi sha ki kyrdan”, la ong u Bah Jyrwa.
Haba ïoh ban ïakren pat sa bad uwei u samla Khasi kata u Bah Nehskhem Surong u ba la shong la sah hapoh Bangalore la kumba 7 snem eiei kata naduh u snem 2016, u la ïathuh ba kumba baroh ki tip ka jylla Meghalaya ka long kaba jynjar ban ïoh kam ïoh jam kumta u la wad ki lad ki lynti bad u la ïoh ïa ka kam hapoh Bangalore.
U Bah Nehskhem Surong u dei napoh ka shnong kaba don sharum jong ka Pynursla bad bad u la ïathuh ba u juh ban shong ban sah ha katei ka jaka bad ka suiñbneng ruh ka long kaba biang bha khamtam ha ka por tlang ka suiñbneng ka long kaba pyngngad bad kam da khriat than.
U Bah Surong u la ïathuh ba u la poi sha katei ka prokram lyngba ka jingïoh pdiang jong u ïa ka jingthoh ha phone na ki paralok ba kan sa don katei ka prokram sohniamtra bad kumta ka pynlong ïa u ba un ïawer ïa la ka lok ban leit sha katei ka prokram ban ïa mad bad thied ïa u soh ba la pynmih napoh ka jylla lajong.
“Ka mynsiem ka lung shisha bad ka long kaba sngewtynnad ban ïohi ba ki soh napoh ka jylla lajong la wan ban die bad pyninam shane Bangalore bad nga ai khublei ïa ka sorkar kaba la shim ïa kane ka sienjam ban pynpaw ïa kine ki soh ki pai jong ngi kiba na shatei bad kane ka long kawei na ki rukom ban pyni sha ka pyrthei ba ngi don ïa ki soh kiba bang bad kiba thiang”, la ong u Bah Surong.
Shuh shuh u Bah Surong u la mynsiem ruh ïa ki paradoh parasnam kiba don ka sap bad ka jingnang jingtip kumno ban thaw ïa ki lad ki lynti khamtam ha ka khaïi ka pateng ba lehse ba kin pynpoi ïa ki soh khamtam ha ki nongbah baheh baheh, kan long kaba ai jingmyntoi bad kaba seisoh namar kin ïoh ka lad ban ïakynduh bad ki nongkhaïi bad kane kan ïarap shikatdei eh ïa ki.
U Bah Surong u la ïaroh ruh ba u sohniamtra Khasi u long uba sngewhun ban bam khamtam lei-lei ba u dei u soh lajong ban peit ruh la ibang lypa ban bam.
