Shillong, Nohprah:
U Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem ha ka Lah Sngi U Blei u la ïoh ban pyllait bad aiti syndon da ka trok thymmai sha ka Dorbar Shnong Rynjah.
Kane ka jingaiti da ka trok ka la long ruh ha kylleng ki shnong bad ka thong jong kane, ka long ban don ïa ka khuid ka suba ha ki shnong ki thaw, kata ban nym don shuh ka jingpynlang ïa ki ñiut ki ñier hynrei lyngba kane ka trok yn kit ban leit bret pat sha ki jaka ba la buh kyrpang.
Ha kane ka sngi nalor u CEM, la ïadon lang u Bah Bindo Lanong uba dei u MDC shu sieh, u Syiem ka Hima Mylliem u Pa’iem Ainam Manik Syiem, u Rangbah Shnong, ki longkmie, ki nongshong ïew lem bad kiwei kiwei.
Ïa kane ka trok la aiti sha ka Dorbar Shnong Rynjah ha ka jingïalang kaba la pynlong ha ïew Rynjah. Kane ka trok kit ñiut ba la pynïoh ka dei kaba la mang lyngba ka Chief Ministers Special Development Fund (CMSDF) bad ïa ka kali la thied ha ka dor T.24 lak.
Haba ai jingkren hadien ba la pyllait ïa ka trok, u CEM u la ong kane ka lynti ba la shim da ka Council ka long halor ka thong ba ka kwah ban pynthikna ba manla ki shnong ki thaw kin long kiba khuid kiba suba bad ym ban shu bret pathar ïa ki ñiut ki ñier katba shaba lap hynrei ban pynlang ha kawei ka jaka ba kane ka trok kan ïoh pat ban kit.
U Bah Pynïaid u la ong ba lyngba kane ka thong ba kum ka District Council ka don, kumta ka la wanrah ruh da ka Solid Waste Management Bill bad ban pyntreikam da ki Resources Recovery Centre (RCC) ha man ki shnong.
Ha kajuh ka por, u CEM u la kyrpad ïa ka Dorbar Shnong Rynjah ba kan wad ïa ka jaka kaba paka na ka bynta ban buh da ka RCC ha kaba yn pynlang pat ïa ki jaboh ba mih na ka ïew bad na ki longïing.
“Ka jingdon ki RCC kan aikam ruh ïa ki trai shnong namar lyngba ki RCC ki paidbah ki lah ban die ïa ki ñuit ba pynlang sha ki kompeni kiba pyndonkam ïa ki ñuit ba la pynlang,” la ong shuh u CEM.
Ha kane ka sngi ka Dorbar Shnong Rynjah ka la ai khusnam ruh ïa ki nongtrei ASHA bad Anganwadi kum ka jingithuh ïa ka jingshakri jong ki ha ka imlang sahlang.
