Shillong, Nohprah 20
Hadien ka hukum jong ka Meghalaya High Court ban weng noh ïa u Jagpal Singh Dhanoa, IPS, kum u Superinten-dent of Police (SP) ka East Jaiñtia Hills, ka sorkar jylla lyngba ka tnat Korbar Jylla (Home Department), ha ka Sngi Ba-Ar ka la pynmih ïa ka byrta ha kaba la pyntip ba la pynkynriah ïa une u heh pulit sha Ri-Bhoi bad un long u SP bathymmai ha Nongpoh.
Ka hukum jong ka High Court bad ka byrta na ka tnat Korbar Jylla ka la wan ha kajuh ka sngi.
Lah ban kdew ba ha ka Sngi Ba-Ar, ka High Court ka la ai hukum ïa ka sorkar jylla ba kan weng mardor ïa u Dhanoa halor ka nongrim ba u khlem lah ban shim ïa ki sienjam ban teh lakam ïa ki kam be-aiñ kiba ïadei bad u dewïong.
“Kumba la ai jingtip, u SP u la don ha East Jaiñtia Hills naduh u snem 2021, bad namarkata, u la dei ban tip kham bha ïa kaei kaba jia ha ka distrik. Ka kaiphod kaba 19 jong u Justice BP Katakey (Retired) ka pynpaw ba u SP lehse um lah ban teh lakam ïa ki kam be-aiñ,” la ong ka High Court ha ka hukum.
Namar ka jingpulom jong u SP kumba la paw na ka kaiphod kaba 19 jong u Justice Katakey, ka High Court ka la bthah ba dei ban weng noh mardor ïa u bad ban wanrah da uwei pat u ophisar uba kham biang ha ka jingtreikam. La bthah ïa ka tnat Korbar Jylla (Home Department) bad ïa u heh duh ki pulit (Director General of Police) ban shim mardor ïa ki sienjam halor kane.
Ha kajuh ka por, ka High Court ka la maham ïa u Deputy Commissioner ka East Jaiñtia Hills, u Abhilash Baranwal, IAS, bad la khmih lynti ba un shim ïa baroh ki sienjam khnang ban pynthikna ba kan don ka jingburom ïa ki hukum ba la ai da ka ïingbishar bad kan don ruh ka jingïaid beit ha ki kam ki jam.
Ha ka jingpynmih ïa ka byrta ba pynbna bujli kam, ka tnat Korbar Jylla ka la pyntip ba u SP bathymmai ka East Jaiñtia Hills un long u Giri Prasad M, IPS uba dei mynta u SP ka Ri-Bhoi ha Nongpoh.
Lah ban kdew ba ka East Jaiñtia Hills ka dei kawei na ki distrik ba bun u dewïong, bad kaba la paw na ka por sha ka por ha ka jingjur jong ka jingtih bad jingkit be-aiñ ïa u dewïong. Ha kawei pat ka liang, ka Ri-Bhoi ka long kum ka khyrdop ba mih ki trok kit dewïong bad ki la don ki khep ba ki pulit ki la lap ïa ki trok kiba kit dewïong be-aiñ.
