Shillong, Nohprah 20
Ki nongñiah taksi kiba hap hapoh ka shatri jong ka Synjuk ki Nongñiah Taksi Sor bad Khapsor ha ka Sngi Balang ki la pynpaw ïa ka jingeh kaba khraw ha kaba ïadei bad ka surok na Anjalee ter ter shaduh sha Ïew Mawlong kaba la sniew palat wat haduh kine ki sngi kiba mynta.
Ka jingsniew jong kane ka surok ha Anjalee ka dei naduh mynshwa bad ym tang ki nongñiah kali kamai kiba la shem jingeh hynrei wat kiba shong ïew bad ki nongwan ïew ruh ki la pynpaw ïa kane kajuh ka jingeh namar ka jingsniew shaba palat jong ka surok.
Na ka liang u Bah J. Nongkynrih uba dei u Assistant Organising Secretary ka Synjuk ki Nongñiah Taksi Sor bad Khapsor, u la ïathuh ba kane ka surok ka la shu sahkut bad sniew kumtei la bun tylli ki bnai bad snem mynta kaba la buh jingeh ïa ki ba kin ïaid lyngba katei ka surok.
U Bah Nongkynrih u la pynpaw ruh ba haduh mynta ka sorkar kam shem la wan ban wan pynbha ne jurip ban maramot ïa kane ka surok, haduh ba ki nongñiah taxi ha kine ki bnai kiba la dep, ki la hap ban leit maramot hi ïa kane ka surok, da ka jingïalum pisa lang bad kine ki nongñiah kali kamai na sor bad khapsor ha ryngkat ki briew shimet kiba la wan ban noh synñiang.
“Ka jingeh ka long ba ka sorkar kam shym la patiaw la bun bun snem mynta bad na ka liang u Bah Sanbor Shullai ruh uba dei u MLA jong ka Laban-Mawprem Constituency u la wan peit bad wan jngoh, kumta ngi kyrmen ba shwa ban kut une u snem ne da la kut une u snem, ngin ïoh noh ïa ka surok kaba thymmai syndon”, la ong u Bah Nongkynrih.
Ki nongñiah taksi ki la ong ruh ba ka sorkar ka la pynbha ïa ka surok tang lada ka ïohi, ba ka la don ka jingïap bad ka jingmynsaw jong ki paidbah hynrei lada kam pat don kano kano ka jingjia kaba kum kata, kam shem la ïohi ba ka surok ka sniew.
“Ngi la shu ïaid ïa ka surok kaba khohruh khohram ha kine ki snem, bad khamtam ha ka por slap lei ka jingeh bad jynjar ban ïaid na kane ka surok ha Anjalee, bad kane ka surok ba la pynïasoh kadei beit u klongsnam jong ka Ïew,” la bynrap ki nongñiah taksi.
Kumta na ka liang ki nongñiah kali kamai ki la kyrpad ïa ka sorkar ba khnang ba kan nym wanrah ïa kano kano ka jingjia kaba sngewsih ne kino kino ki jingjia kiba ym sngewtynnad ïa ki paidbah, ka seng ka la kyrpad ïa ka sorkar ban shna pynbha noh ïa kane ka surok.
“Ngi kyrpad ïa ka sorkar ba kan sngewbha ba kan kitkhia noh ïa kane namar kane ka dei ka khia ka shon bad ka dei ka klongsnam jong ka Them Ïew Mawlong kaba ngi ïaid lynti manla ka sngi”, la ong ki nongñiah taksi.
Na ka liang ki nongñiah kali kamai ki la ïathuh ba ïa katei ka surok ki la dep ban maramot hi dalade la kumba arsien eiei hynrei namar ka jingther jong u ‘lapbah-‘lapsan, ka la pynlong ïa ka um ba kan khlong biang ïa katei ka surok bad hadien katto katne por, na ka liang kitei ki nongñiah taksi ki la maramot biang ha ka sien kaba ar da kaba ïasynñiang pisa lang da baroh ki nongñiah taksi ka Synjuk hynrei katei ka surok ka khlem neh satia.
Shuh shuh na ka liang ki nongñiah taksi kamai ki la ong ba ha ki sngi ba la dep, na ka liang jong ka sorkar ka la don pisa bad pynthied jaka ïa kiwei pat ki jaitbynriew kiba shong ba sah ha Them Ïew Mawlong hynrei ba kan maramot pat ïa katei ka surok kam don pisa satia ban pynbha.
