Shillong, Nohprah 20
Ka jingshet kylla u MDC ka UDP na Nongkrem Bah Lambor Malngiang ban leit ai jingkyrshan ïa ka Executive Committee kaba la lamkhmat da ka NPP ha KHADC ka la pynlong ïa ka UDP ba kan hap ban ïakren sngewthuh jingmut biang bad u MDC ba shu sieh uba dei uwei na ki nongseng ïa ka UDP u Bah Bindo M Lanong uba la leit ai jingkyrshan ha kine ki sngi ïa ka EC ka NPP kaba la ïalam da u Bah Pynïaid Sing Syiem kum u CEM.
Haba ïakren bad u Bah Titos Chyne uba dei u nongïalam ka UDP kaba shong ha ka liang pyrshah ha KHADC, u la ïathuh ba mynta ka sngi ki MDC ki la shim ïa ka rai ban thoh shithi sha u President ka UDP u Bah Metbah Lyngdoh ban pynshitom ïa u Bah Lambor Malngiang uba la leit ai jingkyrshan ïa ka NPP.
U la ïathuh ba u Bah Lambor u dei uba la ïakhun na ka tiket UDP ha ilekshon MLA ba dang shu dep hynrei mynta u la shet kylla ïa ka UDP tang namar ba ka shong ha ka liang pyrshah ban leit kyrshan ïa ka NPP kaba ïalam ïa ka EC.
U Bah Titos u la ïathuh ba ka jingïakren bad u Bah Bindo ka dang ïaid shakhmat bad kan sa mih u soh ha kine ki sngi namar u shim ba ka jingkren pyrshah u Bah Bindo ha kine ki sngi ïa ka UDP ka dei ka jingdom hynrei ka seng ka dang burom ïa u haduh mynta kum u nongïalam ba la slem ha ka seng UDP.
U Bah Titos u la ong ba naduh ba khyllem ka Executive Committee ba la synshar da ka UDP, u Bah Lambor u la don lypa sha ka kynhun ba la ïalam da u Bah Pynïaid Syiem kaba dei ka seng ba la ïalam da ka NPP.
Ngi la dep rai baroh ki MDC ka UDP ba ngin shong beit ha ka liang pyrshah hynrei ngi kyndit ban ïohi ba u Bah Lambor u la leit ai jingkyrshan ïa ka EC ba la ïalam da ka NPP ha KHADC.
