Shillong, Nohprah 20
Ka jingsdang jong ka dorbar tlang ka Khasi Hills Autonomous District Council (KHADC) ha ka Sngi Balang ka la khluit tar na ka jingtied miej u Nongïalam ka Liang Pyrshah u Bah Titosstarwell Chyne halor ka rukom khot bad pynlong dorbar bad kynnoh ba ki la pynkheiñ bad ïaid lait na ki kyndon treikam.
La ïoh ban sakhi ba mar ïasdang ka dorbar tlang jong ka KHADC bad mar ïa pynbna u Chairman ban sdang noh ïa ki kynta kylli jingkylli, u Bah Titosstarwell Chyne uba dei ruh u MDC ka UDP na Sohra, u la ïeng bad rah da ka ‘Point of Order’ ban pan jingshai halor ka rukom khot pynlong dorbar bad ban buh jingkylli ruh la ka don ne em ka jingbuh jingkheiñ lang ïa ka dorbar ba khot kyrpang ne ka special session.
“Nga bad ki dkhot ka liang pyrshah ngi kwah ka jingshai ba ha kano ka kyndon bad nongrim la kheiñ lang ïa ka dorbar ba khot kyrpang bad ki dorbar ba pura jong ka council bad lada dei ba kheiñ lang ïa kita ki dorbar kyrpang, balei pat ym shym la ailad ïa ki dkhot ka liang pyrshah ban buh ki jingkylli bad ki motion,” la buh jingkylli u Bah Titos.
Hadien ba u Bah Titos u la pynpaw ka jingbitar bad tied miej haba pan jingshai halor ka rukom khot bad pynlong dorbar, u Chairman ka KHADC u Bah Lamphrang Blah u la pynshai ba ka jingkhot dorbar ka long katkum ki kyndon bad kam dei kaba la shu khot shimet.
Une u nongïalam ka Liang Pyrshah u la ong ba kane ka rukom khot pynlong dorbar khamtam shwa ka jinglehkmen Khristmas ka dei ka bym pat ju jia koit bad kaba la pynkulmar jingmut ym tang ïa ki hynrei wat ïa ki ophisar ka council, bad pynpaw ba ka jingwanrah ïa kane ka mat ka long ban shai bad khnang ba ka ophis u Chairman bad ka Executive Committee kin pynkylla noh ïa ka AD Rules kaba don bun ki jingduna.
Shuh shuh na ka liang u Bah Titos u la buh jingkylli ruh halor ka jingpynpoi ïa ki bill sha ki dkhot ha shwa ban sdang ka dorbar, kaba khlem ai por satia ïa ki dkhot ka liang pyrshah ban pule bad peit bniah ha shwa ban ïatai hapoh ka ïingdorbar.
“Phi wanrah bill mynstep, hato ngin pule noh hangto. Kane ka pyni ba phi leh donbor bad phim burom shuh ïa ki dkhot bad ban leh katba phi mon da kaba ïaid lait ïa ki kyndon baroh,” la ong u Bah Titos.
U Bah Titos u la ong, “Ha ka dorbar kaba la dep, nga la dep ban ong ba ka EC ka dei ban ai por la kumno kumno ar ne lai sngi ba ngin ïoh ban pule bniah, hynrei kumba long mynta pat, la leh biang kumjuh bad la shu wanrah kyrkieh ïa ka bill. Hato kum ki dkhot ka liang pyrshah ngim don hok mo ban pule ïa ki bill. Kumta lada wanrah kyrkieh kumne ïa ki bill, ka bha ba phin mynjur noh syndon bad ynnai ap shuh haduh kata kawei pat ka sngi. Haba pynshai halor kane, u Deputy CEM u Bah Pynshngaiñ N Syiem u la ong, ka jingkhot dorbar ha une u bnai bad ki tarik, ka dei kaba la leh bad bud katkum ki kyndon, ha kaba ym shym la pynkheiñ satia ïa kata ka rukom pynlong dorbar. U Bah PN Syiem u la ong ba katkum ki kyndon ka la kdew ba ka jingpynlong ïa ka dorbar kam dei ban slem palat ïa ka saw bnai. Kumta kam shym la don satia kata ka jingpynkheiñ ne ïaid lait na ka Rule 36 jong ka AD Rules.
“Ngim shym la ïaid ne pynkheiñ ïa ki kyndon, hynrei la ïaid katkum ki kyndon kiba la kdew,” la ong u Bah Syiem.
