Shillong, Nohprah:
Kum shibynta ka jingpynkhreh ïa ka ilekshon MDC shapoh ka ïingdorbar thawaiñ jong ka Khasi Hills Autonomous District Council (KHADC), u Bah Shemstar Rynjah bad uba long ruh u nongshong shnong jong ka Lawsohtun Block-6, u la pynbna paidbah ba un ïakhun ïa ka ilekshon MDC ka ban sa wan ha u snem 2024 na ka jingkhmih lynti ba ki khynnah ba u la hikai ban ïalehkai bad ruh kiba u la ïarap ha ki por ba la dep kin ai ka jingkyrshan bad pynjop ïa u ha katei ka ilekshon ban sa wan.
Haba kren sha ki lad pathai khubor ha ka Sngi Ba-ar ha Shillong Press Club, u la pynbna ba un ïeng bad aireng ha ka ilekshon MDC kum u kyrtong shimet khlem da pynïasoh bad kano-kano ka seng saiñ pyrthei.
U Bah Rynjah u la ïathuh ba la kha ïa u bad u la heh la san hapoh ka shnong Lawsohtun Block-6. U la pyndep ïa ka jingshong skul na ka Sunderland Memorial School Madan Laban bad kumjuh na ka Presbyterian High School.
U Bah Rynjah u la ong ba ka jingmih jong u shakhmat ban ïakhun ïa ka ilekshon MDC ka dei namar ba u don ka jingkhuslai na ka bynta ka ri bad ka jaitbynriew ha kaba katba nang mih ki sngi bad ki por ka nang duk bad ki paidbah ka konstitwensi ruh ki nang sah kumjuh.
U la ong ba kumba ha ki por ba la leit u la ïalam ïa ki khynnah rit ban ïalehkai phutbol na ka kynhun jong u kata ka Rangkynsai Football Club bad kumjuh u la long napdeng uba mih shakhmat ban ai ka jingshakri ïa ka shnong lyngba ki kam bapher bapher jong ka dorbar shnong ba u la bat.
“Ngam banse ban mih shakhmat ban kyrpad ïa ki paidbah ba lada phin ailad bad ai ka jingkyrshan ïa nga, ngan pyni da ka kam ym ba ngan kren da ka ktien”, la ong u Bah Rynjah.
U la ong ba ka jingmih jong u shakhmat ka long ruh ha kaba ïadei bad ka jingshah ban beiñ jong ki paid Khasi bad Jaiñtia khamtam kito kiba duna ha ka ïoh ka kot namar ba kim ïoh ka kam ba kin trei kin ktah.
U la ong ba kumno ka sorkar kam lah ban wad ka lad ka lynti ba ki paidbah kiba duna ka ïoh ka kot kin ïoh ban kamai suk bad ba baroh kin ïoh ban im suk. Kumta lada ki paidbah ki jied ïa u kum u MDC ka Laban-Mawprem konstitwensi un weng lut ïa ka jingkhapngiah hapoh surok bad kiwei kiwei ki jingeh.
“Ki dang bun kiei kiei ba ngi dei ban leh ha kaba ïadei bad ka jingïaleh kilan met ban rah ïa ka Meghalaya shajrong bad ki dang bun ki jingduna ba ngam lah ban batai na ka shyntur hynrei lada nga la don ha ka bor, ngan sa pyni ïa ki jingmut jingpyrkhat kiba nga don”, la ong u Bah Rynjah.
U Bah Rynjah u la ong ruh ba u kloi ban mih shakhmat ban shah thngan lang sha Delhi haduh ban da pynïoh Inner Line Permit (ILP) ïa ka jylla.
“Kumno kine ki nongmihkhmat jong ngi ki pyrkhat ngam tip bad ngam tip ki don ne em ka jingieid ïa ka Jaitbynriew naduh mynsiem tangba nga te nga don, ngam kwah ban leh politik eiei hynrei lada ki paidbah ki ailad ngan sei ïa ki jingmut jingpyrkhat jong nga kiba nga don ban kyntiew ïa ka jylla bad ïa ka Ri India baroh kawei”, la ong u Bah Rynjah.
