Shillong, Nohprah 20
Ka Khasi Hills Autonomous District Council (KHADC) ha ka Sngi Balang ka la mynjur ban thaw biang (re-constitute) ïa ka Khasi Traditional Medicine Commission (KTMC).
Katkum ka kaiphod jong ka Executive Committee ba la wanrah da u Chief Executive Member (CEM) Bah Pynïaid Sing Syiem ha ka sngi sdang jong ka Dorbar Tlang ka Council, ïa kane ka Commission la thaw biang katkum ka KHAD (Protection and Promotion of Khasi Traditional Medicine) Act, 2011.
Kane ka Commission ba 12 ngut ki dkhot ka dei kaba la khlieh da u CEM kum u Chairman bad u Joint Secretary ka Executive Committee Bah A Nonghuloo kum u Secretary.
Ki dkhot jong ka Commission ki kynthup ïa saw ngut ki nongai dawai kynbat Dr D.L Nongspung, Dr Alka Kharsati, Dr Boss Myrthong bad Dr Dlas Rani, arngut ki nongai dawai Dr J.P Lyngdoh bad Dr Sparstarlin Nongrem bad 4 ngut ki ‘riew pawkhmat ka imlang sahlang ba kynthup ïa u Dr P.S Nianglang, Dr Fabian Lyngdoh, Bah Kitboklang Nongphlang bad Bah R.S Wanniang.
