Shillong, Nohprah:
U Myntri Rangbah ka Jylla, Conrad K. Sangma lem bad ka Myntri ka tnad ka koit ka khiah, Dr. M. Ampareen Lyngdoh ha ka Sngi Ba-ar ki la plie ïa ka projek ICU ba 10 jingthiah ne ka ’10BedICU’ ha 14 tylli ki jaka sumar ha 11 tylli ki distrik jong ka Jylla.
Katei ka projek ka dei ka ‘Private Public Partnership’ hapdeng ka tnad ka koit ka khiah jong ka Sorkar Jylla bad ka ‘eGovernment Foundation’. Kane ka sienjam ka kynthup ïa 10 tylli ki jingthiah ha ki ICU kiba don ha ki jaka sumar Sorkar ha ki kyrdan jong ki distrik.
Haba kren ha ka jingïalang plie, u Myntri Rangbah u la ai jingïaroh ïa baroh kito kiba don bynta ha katei ka projek da kaba pyntikna ba ki lad jingsumar bad ki jingshakri la pynbiang sha ki jaka kyndong-kynshrot jong ka Jylla ba kynthup ha ki jaka sumar ha ki distrik bapher-bapher.
“Ka jingdon-jingem bad rukom treikam kaba la pynïeng kan shah ïa ngi ban pyndonkam hok ïa baroh ki jingdonkam bad ban pyntreikam ïa ki ha ka rukom kaba paka tam. Ka dei ka jingangnud ban pynïar ïa kane ka kam khnang ba ka jingkyrshan kaba biang tam ha ka liang ka koit ka khiah sha katto-katne ki jaka ba kyndong bad shem jingeh ban poi jong ka Jylla kan long kaba jop,” la ong u Myntri Rangbah.
Haba pynsngew ba ka Sorkar Jylla ka buh hakhmat eh ïa ka tnad ka koit ka khiah, u Sangma u la ong, “Ngi kwah ban buh hakhmat eh ïa ki tnad ba kyntiew ïa ka imlang-sahlang bad ka koit ka khiah kan long kawei na kiba kongsan ka ban hap pynleit jingmut. Da kaba buh jingmut ïa kane, ka Jylla mynta ka la buh bynta 8% na ka jingmang jong ka ha ka koit ka khiah – kaba long ruh kaba heh tam hapoh ka ri.”
Na ka liang ka Myntri ka tnad ka koit ka khiah, Dr. M. Ampareen Lyngdoh ka la ong ba lyngba kane ka projek, ka Sorkar Jylla kan sa lah ban pynbiang ïa ka jingsumar ha ka liang ka ICU ha ki kyrdan jong ki distrik. Ka la ong ruh ba ka jingplie ïa ka projek ’10BedICU’ kan ïaid shakhmat ha ka ban pyntikna bad wanrah jingkylla na bynta ban pynbha ïa ki lad jingsumar bapher-bapher hapoh ka Jylla.
Ha katei ka jingïalang plie, la ïadonlang ruh u Chief Secretary, Bah D.P. Wahlang, Principal Secretary ka tnad ka koit ka khiah, u Sampath Kumar, Chairman ka Infosys Nandan Nilekani, Chairman 10BedICU Srikanth Nadhumuni, Founder Karuna Trust, Dr. Sudarshan Hanumappa bad Public Health Expert & Scientist Nichiket Mor.
Ïa ka projek ’10BedICU’, la pynkha kum ka jubab ïa ka kylla ba-ar jong ka khlam COVID-19, ha ryngkat ka thong ban wanrah ïa ka lad jingsumar na bynta ki jingsumar ba kham shitom ha kylleng ki distrik, ba kynthup ha ki jaka ba kyndong tam jong ka ri.
Ha kajuh ka por, ïa ki 14 tylli ki ’10BedICU’ ha Meghalaya la bei tyngka da Vinod Khosla bad HDFC Bank Parivarthan. Kiwei-kiwei ki NGO bad ki karkhana ïatehlok ki la ïawan lang ban pyntrei ïa kane ka projek ba kynthup ïa ka eGovernments Foundation, Hamilton Medical, Google Cloud bad Koita Centre for Digital Health ha IIT Bombay.
Shuh shuh haba ïadei bad ka ’10BedICU’ la dep pynïeng ïa ki ICU Unit ha 206 tylli ki ‘hospital’ ha 9 tylli ki Jylla ba kynthup ïa ka Karnataka, Telangana, Andhra Pradesh, Manipur, Assam, Nagaland, Sikkim, Meghalaya bad Puducherry.
