Shillong, Nohprah 20
Ka Ïingdorbar KHADC ka la mynjur ïa ka rai (resolution) ban kyntu ïa ka Sorkar Pdeng lyngba ka Sorkar Jylla ban wanrah noh ka jingpynkylla ïa ka Constitution (Scheduled Tribes) Order, 1950 ban ithuh tang ïa kiba dei hok ki trai Jylla kum ki riewlum ka Jylla.
Ïa kane ka rai (resolution) la wanrah da u Chief Executive Member (CEM), u Bah Pynïaid Sing Syiem ha ka sngi basdang ka dorbar tlang ka KHADC.
Haba wanrah ïa kane ka rai, u CEM u la ong ba ka jingdon kiwei pat ki riewlum na kiwei ki Jylla kiba lah ban ïoh ïa ka jinglong ST hangne ha Jylla ka ktah ïa ki riewlum kiba dei ki trai Jylla.
U Bah Pynïaid u la ong lada kiba dei ki riewlum na kane ka Jylla ki leit shawei ki Jylla kim hap ha ka ST hynrei la ñiew ha ka thup ba long kyllum (general category).
“Lyngba kane ka rai (resolution) ngin kyntu ïa ka Sorkar Jylla ban pynsngew ïa kane sha ka Sorkar Pdeng namar ka jingdonkam kyrkieh ban pynkylla noh ïa ka Constitution (Scheduled Tribes) Order 1950. Dei tang ki riewlum kiba dei trai na kane Jylla yn ithuh kum ki ST kiba dei na kane ka Jylla,” la ong u Bah Pynïaid.
U la ong ruh ba ïa kane ka mat ym donkam ban da kren bun ktien hynrei kaba donkam ka long ban ïakhun ban pynkylla ïa kane ka ST Order.
Haba pynphai nia ïa ka jingkynthoh u MDC ka Sohra u Bah Titosstarwell Chyne uba la kynthoh ba ka EC kam kren ei ei shaphang ka jingïoh thied jaka ki riewlum na kiwei ki Jylla ha Meghalaya, u Bah Pynïaid u la ong ba ka EC ka la shimkhia ïa kane ka mat tang ha kine ki san bnai hynrei u Bah Titos la lai snem shiteng ha ka por ba u long kum u CEM, u la leh aïu haba ïadei bad kane ka mat.
U Bah Titos u la ong ba ki riewlum na kiwei ki Jylla kum na Mizoram ki ïoh jaka ha Madanrting bad ki don ruh kiba ïoh thied jaka ha Pillingkata bad ai nuksa ruh ïa ka jingjia ha Manipur ha kaba la jia ka jingumsnam hapdeng ki Kuki bad Meitei.
Kiwei pat kiba la shimbynta ban kren ki long u Dy CEM Bah PN Syiem, u MDC na Mylliem Bah Ronnie V Lyngdoh, u MDC na Rambrai Bah Banjop Pyngrope, Bah Jambor War, Bah Latiplang Kharkongor.
U Bah Latiplang u la pynkynmaw ruh ïa ka rai bad ka hukum ka Supreme Court haba ïadei bad kiwei pat ki riewlum kiba dei na kiwei pat ka Jylla.
