Shillong, Nohprah 20
Saw tylli ki jaka pynmih bording ha kane ka Jylla kin ïoh ban maramot ïa ki jaka ba den ïa ki pung (dam) kiba pynmih bording ilektrik lyngba ka skhim Dam Rehabilitation and Improvement Project Phase II (DRIP-II).
Kine ki saw tylli ki projek ki long ka Myntdu-Leshka, Umïam Stage-I, bad Umïam Stage-III bad Stage-IV ha kaba yn maramot lyngba ka skhim DRIP ha ka jinglut kaba long T. 45.58 klur.
Tang ïa ka Umïam Stage-I Hydro Electric Project, ka jingmang pisa ïa ka jingmaramot kaba dang ïaid mynta, ka long T.16.94 klur.
Ka jingmaramot ïa kine ki dam ka long ka jingshngaiñ khamtam ban nym jia kano-kano ka jingma ha ki por ban sa wan.
Ka tyllong khubor ka ïathuh ba ka kompani Italian Thai Development Cementation Limited (ITDCL) ka dang pyntrei mynta ïa ka dam ha Umïam bad ka thong ban pyndep ïa ka jingkamai dewbilat thymmai sha ki bynta ba shatrai jong ka dam ka dei ha u Lber, 2024.
Katba ka jingmaramot ka dang ïaid ki kali rit kiba wan na Guwahati bad thaiñ Ri Bhoi ki hap ïaid na ka surok najan Umroi Airport bad ïaid lyngba ka Umrynjah ban poi sha Mawlai.
Ki kali heh kum ki trok bad ki bos ki hap ïaid na Shillong Byepass ban poi sha Shillong bad ym don ka lad da kumwei pat ban poi sha Shillong.
