Shillong, Nohprah 20
Ka tnat Shillong Traffic Police (STP) ka la pyntip ba kan pynlong da ka jingtalasi kali ha kylleng ki bynta jong ka nongbah Shillong na ka bynta ban tehlakam ïa ka jingñiah kali khlem akor bad hapdeng ka jingbuaid kyiad ban pynthikna ban lait na ki jingjia ba sngewsih.
Kane ka jingpynbna ba la pynmih da ki pulit pynïaid kali, ka long namar ba kane ka por ka la dei ka aïom lehkmen bad ka jingpynkhreh ïa ka Khristmas. Kumta ban pynthikna ba kan nym don kano-kano ka jingpynher kali ne ñiah kali buaid ka ban buh pat ha ka jingma ym tang ïa ka jingim ki nongñiah kali hynrei wat ïa ka jingim jong kiwei.
Ha ka kyrwoh ba la pyllait da u Superintendent of Police (City) Bah Vivek Syiem u la ong ba ka jingtalasi kali jong ki pulit kan long ha kylleng ki jaka ba kynthup ha ki surok By-pass, surokbah (highways) bad ki surok shnong. Kumta lada lap ïa kino-kino kiba ñiah kali bad ka buaid palat (30 mg. per 100 ml. ha ka snam) kin shah pynshitom hapoh ka kyndon Section 185 MV ryngkat ka kuna T.10,000 lane shah set along haduh 6 bnai lane shah pynshitom baroh ar.
“Ka Shillong Traffic Police (STP) kan pynleit jingmut bha ha kaban bat ïa kiba ñiah kali hapdeng ka jingbuaid bad ba ñiah khlem akor nalor ki jingpynkheiñ ïa ki kyndon MV Act namar kane ka dei kaba buh jingma,” la ong ka kyrwoh.
Kumta na ka liang jong u SP u la kyntu ïa kiba ñiah kali ym tang ba kin ñiah shngaiñ hynrei ban kiar ruh na ka jingñiah kali hapdeng ka jingbuaid ban pynthikna ym tang ïa ka jingshngaiñ ïalade shimet hynrei ïa kiwei ruh kumjuh.
