Shillong, Nohprah 20
U nongaibuit barim jong ka UDP u Bah Bindo M Lanong u la ong ba u Bah Metbah Lyngdoh kum u President bad Bah Jemino Mawthoh kum u General Secretary ka UDP ki dei ban shim jingkitkhlieh haba u Bah Lambor Malngiang u la leit ban kyrshan ïa ka NPP ha KHADC.
Kane ka jingkynnoh u Bah Bindo ka dei namar u la dep pynpaw naduh basdang ba ym dei ban ai tiket ïa u Bah Lambor namar u dei u briew uba nabar hynrei ki pynduh tiket ïa u ha ka ilekshon MLA na Nongkrem konstitwensi ban ai sha u Bah Lambor.
Kumta u Bah Bindo u la ong ba ka jingleit ai jingkyrshan u Bah Lambor Malngiang ïa ka Executive Committee ba la ïalam da ka NPP ka jingkitkhlieh kan dei ha kitei ki arngut kiba ai tiket ïa u Bah Lambor ha ka ilekshon MLA.
“Nga la dep pynpaw naduh basdang lada ki ai tiket ïa u dkhot ka UDP ngan ïatreilang, hynrei ki ai tiket da u briew uba nabar, hynrei ki pynduh tiket ïa nga uba dei u nongseng kam lah ban long” u la ong.
U Bah Bindo u la ong biang ba ka UDP mynta ka la duh ïa u trai uba dei u nongseng kaba khlem ai tiket bad ka la duh ïa uba ka ai tiket namar u khlem don shuh ha ka seng.
U la ong ba watla u kren pyrshah ha kine ki sngi ïa ka jingai tiket ka UDP ïa Bah Lambor hynrei mynta u hap ban ïatreilang bad u Bah Lambor bad ka EC ba la ïalam da u Bah Pynïaid Sing Syiem.
