Shillong, Nohprah:
Ka Kynhun Myntri ka la ai jingmynjur ban shah bad pdiang ïa kito kiba la pyndep ban shah hikai hapoh ka tnat thaiñ jingthaiñ (Department of Textiles) ha ki snem kiba la leit wat lada ki la palat ka rta ban thep kam halor ka nongrim ba kine kiba la pyndep ïa ka jingshah hikai kim shym la ïohlad satia ban thep kam baroh shikatta namar ym shym la don nongpynlong ïa ka jingpynrung kam hapoh ka tnat naduh u 2015.
Haba ïathuh ïa kane sha ki lad pathai khubor, u Myntri Rangbah u Conrad K Sangma u la ong ba ki la don kiba la pyndep ïa ki kynja jinghikai kiba ïadei bad ka tnat Sericulture & Handloom kiba la kyrshan da ka Sorkar ban ai baibam hynrei ynda ki la pyndep ïa ki jingshah hikai, kim shym la ïohlad satia ban rungkam namarba naduh u 2015 khlem don ka jingpynrung kam.
Kumta u la ong ba da kane ka jingmynjur ka kynhun Myntri, mynta yn sa lah ban khot pynlong ïa ka eksamin pynrung kam bad kito kiba la pyndep ïa ka jingshah hikai kiba la palat ka rta ruh kin ïoh ban thep bad ynda la dep ka jingjied, ynda thungkam pura ïa ki.
“Na ki 196 ngut kiba la pyndep ïa ka jingshah hikai, ki don 115 ngut kiba la palat ka rta bad dei na kane ka daw ba la mynjur kum ka lad kaba long kyrpang tang shisien na ka bynta jong ki..
Ka Kynhun Myntri ka la mynjur ruh ban wanrah ka jingpynkylla hapoh ka Meghalaya Civil Defence and Home Guards (Subordinate) Service Rules ban kham pynkiew ïa ka kyrdan pule kiba thep kam pulit Home Guard ka ban ïahap bad ka kyrdan pule ha ka tnat pulit haba pyndap ïa ki jaka bathylli ki bym pynrung kam.
Shuh shuh ka Kynhun Myntri ka la ai jingmynjur ruh ban pynkylla ïa ka Meghalaya Public Service Commission Regulations, 1972 ban weng ïa ki kyntien ‘Backward Classes’ namarba ha ka Reservation Policy jong ka Jylla ruh ym shym la don ka jingong ban ai bhah ïa ki Backward Classes namar ym shym la don kano kano kaba kdew hapoh ka policy hynrei kitei ki kyntien ki shu don ha ka Regulations, 1972.
