Shillong, Nohprah 21
U Nongïalam ka Liang Pyrshah u Bah Titosstarwell Chyne u la buh jingkylli ba haduh katno tylli ki aiñ ba kane ka Executive Committee hapoh ka jingïalam u Bah Pynïaid Sing Syiem ka la thaw bad ïoh jingmynjur.
Ïa kane ka jingkylli u Bah Titos u la buh ha ka por ba u la wanrah ïa ka motion ha kane ka dorbar tlang ka KHADC ban ïakren halor ka rukom treikam jong kane ka Executive Committee kaba mynta.
U Bah Titos u la ong haba wanrah ïa kane ka motion u la pyrkhat ban kren halor kiei, hynrei u la kyndit kynsan pat ban ïohi ïa ka jingmih khubor ha kawei na ki kot khubor, ka jingkren ba la ai da u CEM, kaba u ong ba 5 bnai ki la leh bun ki kam, ka EC ba la leit pat 3 snem shiteng ka la leh aïu?
“Ha ka jingshisha kum ka EC ka la dei ban kmen ba na ka liang ka Liang Pyrshah ngi la ai ka jingkyrshan kaba pura ïa ka resolution bad ha kano ka rukom ka mih ban ong ba ka EC barim 3 snem shiteng ka leh aïu. Nga ieh ha u CEM bad ngam kwah ban pynksan eiei halor kane,” la ong u Bah Titos.
Une u Nongïalam ka Liang Pyrshah u la ong, “Ba jait ba kane ka la mih hapoh ka ïingdorbar, da ka mynsiem ba sngewkhia nga kwah ban pynkynmaw ïa ka ïing, ba ka jingkren kaba mih ha ki kynta jingkylli na u MDC ka Mawthadraishan ba na ki 13 ki Bill ba la pass ha ka samoi treikam ka jong ngi, 5 tylli ngi la ïoh ka jingmynjur, namar kynmaw la jied ïa ngi ki nongmihkhmat ban thaw aiñ, lada phi la ong ba phi la leh bun kiei kiei, kwah ban kylli tang kawei, katno tylli ki aiñ phi la ïoh jingmynjur.”
“Phi don ha ka sorkar, phi don ha ka bor, phi don ha ka lynti ba lah ban pynkloi ban pass ïa ki aiñ, hynrei kynmaw u paidbah un ym kylli katno ka roi ka par phi leh. Ngi don hangne kum ki nongthaw aiñ, ngi la wanrah ïa ka Land Bill, ngi la ïoh jingmynjur ïa ka Solid Waste Management Act, ka amendment jong ka Market Act, ka Village Development Council Act. Kine dei ba ngi la leh,” u la ong.
Shuh shuh u la ong ba kawei na ki jingeh ba ka council ka ïakynduh ka dei kaba la slem, la 5 bnai ka council ka khlem ïoh ïa ka 15th Finance Grant, ka daw bym shym la pyndep ïa kaei kaba ka Ministry ka kwah.
Haba pynshai halor kane, u CEM ka KHADC u Bah Pynïaid Sing Syiem u la ong ka jingdon ha ka EC kam dei tang na ka bynta ka myntoi shimet jongno-re-jongno hynrei ka dei na ka bynta ka bit ka biang jong baroh lang.
U CEM u la ong, “Ha kaba ïadei bad ka 15th Finance Commission Grant, ngi sngewthuh ba na ka liang u CEM barim ruh u la pyrshang katba lah hynrei la katto katne snem khlem ïoh grant shuh, hadien ka 2019 la wan sa ka khlam Covid, khlem ïoh treikam, kum ka kynhun haba la pyrshang ngi la ïoh ban pynpoi ka fund na ka 15th Finance Commission ha ka Untied Grant 2020-21 kaba long T.20.47 klur tam, na ka Tied first installment jong u snem 2021, T.20.47 klur bad na ka bynta ka archive jong ka second installement jong u snem 2021 bad ka Tied second installment jong 2021 kaba long T.20 klur tam bad T.20 klur tam nangta ka Tied first installment jong u 2021-22 ka long T.18 klur, ki dei tang kine hi kiba ngi dang ïoh ha kito ki snem na ka bynta ka fund ban pyntreikam ïa ki kam pynroi.”
“Hooid ngi la leh shibun ki kam, ki jingpynkhreh kiba bun bad ngim shym la don ka jingthmu ban kdew kti ne kynnoh ïano ïano ruh, hynrei tang lyngba ka jingïatreilang, ngin lah ban peit ïa ka bit ka biang jong baroh lang,” u la ong.
