Shillong, Nohprah 21
Ki jingthaba bad ki jingphyrnai ha ryngkat ki jingpynitynnad ha ki bynta jong ka thaiñ Khyndai Lad ka la khring shi kat dei ïa kiba bun bah ki paidbah na ka bynta bapher bapher jong ka jylla bad khamtam ïa ki briew kiba nabar jong jylla ruh kiba kwah ban wan sakhi ïa ka jinglehkmen Khristmas jong ki briew hapoh ka nongbah Shillong. Pynban hapdeng kine kiei-kiei baroh ha ka 21 tarik u Nohprah 2023, na ka liang U Nongsaiñ Hima u la pyrshang ban ïakren bad ki nongdie jingdie hapoh ka thaiñ Khyndai Lad khamtam ïa kiba shong die madan halor ka jinglong jingman jong ka ïew ka hat.
Haba ïoh ban ïakren bad kawei ka longkmie kaba shong die jingdie ha ki thaiñ Khyndai lad ka la ïathuh ba ka ïew mynta ka la hiar bha namar bun na ki briew ki shu wan tang ban peitkai ïa ki jingpynitynnad hynrei ym ban thied jingthied.
“Ki shu wan tang ki briew bad kiba bun ki wan tang ban peitkai bad shangkai hynrei ban ong ha ka die ka thied te ka la hiar bun kumba ka ju long barabor”, la ong ki nongdie jingdie.
Kitei ki nongdie jingdie ki la ong ba ha ki por mynshwa kim ju don kiba kum kine ki jingphyrnai kiba ka sorkar ka la leh. Pynban mynta u snem pat na ka daw ka jingpynitynnad, kiba bun ki paidbah ki la wan tuid sha Khyndai Lad bad ka dei ruh ka sien kaba nyngkong ba ka sorkar ka la pynitynnad bad pynphyrnai ïa ka Khyndai Lad baroh kawei kumba ka long mynta.
Kitei ki nongdie ki la ïathuh ruh ba ha kum kine ki por, ka jingjyllei ki kam tuh ruh ki jyllei bha namar ki jingïohi ïa ka jingkhapngiah jong ka Khyndai Lad.
Nalor kata, kitei ki nongdie jingdie ki la ïathuh ruh ba ki briew kiba wan ban pynshna bad pynitynnad ïa ki bynta jong ka Khyndai Lad ki dei kiba ka sorkar ka la lah khot naduh na Kolkata.
