Tura, Nohprah 21
Ka ATM jong ka State Bank of India (SBI) kaba don ha Rongram bad jngai kumba 15 kilometer eiei na Tura, ka la shah kyndang ha ka miet Sngi Balang ha ka kynhun ki nongtuh. Ha kane ka jingjia ki nongtuh ki la ïoh ban rah ei ïa ka pisa kaba kot kumba T.30 lak eiei.
Ka khubor kaba la ïoh na ki pulit la ïathuh ba ki nongtuh ki la pyndonkam da ki ‘gas cutter’ na ka bynta ban kyndang bad plied ïa ka ‘strong box’ jong katei ka ATM.
Ha kaba ïadei bad kane ka jingjia la lap nyngkong da ki briew kiba thmu leit sei pisa ha ka step Sngi Palei kiba la ïohi ka jingmeh ding shapoh ka jaka ba don kane ka ATM.
Hadien kane pat la pyntip noh mar-mar bad na ka liang jong ki nongtrei ka Bank ryngkat bad ki pulit ki la wan hiar sha kane ka jaka ba don ka ATM ban pynlong ka jingtohkit. Watla ym pat ïoh ka jingkheiñ kaba thikna bad pura, hynrei ki nongtrei ka bank ki la antad ba ka pisa kaba la shah rong ei na kane ka ATM ka la kot palat T.30 lak eiei.
Katkum ka jingïathuh la ong ba ka rukom tuh ka dei kaba la ïasuhbuit bha bad kaba da plan janai ha kaba ki nongtuh ha shwa ban kyndang bad ot ïa kane ka ATM ki la synreit da ka rong ïong ïa ki kor CCTV kiba la pyndait ban lait na ka jingshah kem dur.
Kane ka ATM kaba don shabar ka Rongram Petrol Station jong ka Indian Oil, ka dei kaba la pynap da ki CCTV na kane ka Petrol Station bad ruh ki CCTV jong kawei ka showroom ar shaka kaba don marjan. Ka CCTV kaba jan eh ka dei jong ka showroom hynrei kane ruh ka la shah pynjulor da kaba synreit rong.
