Nongstoiñ, Nohprah:
Ka Ri Khasi Sepngi Federation (RKSF) ha ka Sngi Balang ka la leit ban ïakynduh ïa u CEM ka Khasi Hills Autonomous District Council (KHADC) ban aiti ïa ka dorkhas halor ka jingduna ki nongtrei ha ka shlem treikam ka KHADC, West Khasi Hills District.
Haba kren sha ki nongthoh khubor, u President ka RKSF u samla Mawkordor Kharsyiemlieh u la ong, ha katei ka jingleit ïakynduh halor katei ka mat, na ka liang u CEM u la kular ba un sa shimkhia bad ha kaba u la kubur ruh ba ka shlem treikam ka KHADC ha West Khasi Hills ka duna shisha haba bun ki liang.
Shuh shuh u la ong ruh ba katkum ka dorkhas ïa kaba la aiti da ka RKSF sha u CEM ka KHADC, la pynpaw ruh halor ka jingdonkam ha kaba ïadei bad ka mat na ka bynta ki kam ïalehkai ha kaba ka RKSF ka la kyntu ba ka la dei ka por ïa ka KHADC ba kan ithuh kyrpang noh ïa ka sports hapoh Khasi Hills khnang ba ki khun samla kin ïoh jingmyntoi.
U samla Mawkordor u la ong ruh ba ka jingithuh noh ïa ka kam ïalehkai kan long ka jingmyntoi ïa ki khun samla ha kaba kin ïoh jingmyntoi khamtam ha ki tiar ïalehkai bad kiwei kiwei ki jingdonkam ha ki kam ïalehkai namar napoh ka KHADC haduh mynta ka dang don tang ki skhim ban shna lane tei (construction). Namar kata, ka RKSF ka kwah ba ka KHADC kan ithuh kyrpang noh ïa ka kam ïalehkai ba ki khun samla kin ïoh shibun ki jingmyntoi.
