Shillong, Nohprah 21
Ka Khasi Students’ Union (KSU) Education Cell ha ka Sngi Palei ka la leit ban ïakynduh ïa u Myntri ka tnat Pule-Dangle ka jylla u Rakkam Sangma na ka bynta ban pynsngew ha u halor ka jingeh kaba kum ki samla pule ki mad naba ki hap leit ïaleh ïa ka eksam CSIR NET shabar ka jylla Meghalaya.
Kane ka jingleit ïakynduh Myntri jong ka seng hapoh ka jingïalam jong u Samla Richest Malngiang bad u Samla Shelkitbok Kharbani ka la long hadien ba kum ka seng ka la ïoh ka jingujor na kiba bun ki samla pule halor ka jinghap ban leit ïaleh ïa ka eksamin CSIR NET 2023 shabar jylla.
La pyntip ba kane ka eksam ka dei kaba la buh ban long ha ka 26, 27 bad 28 tarik jong une u bnai bad ki samla ka Jylla ki hap ban leit ïaleh ïa kane ka eksamin shabar ka jylla kum sha Jorhat bad Dibrugarh.
Ha ka kyrwoh na ka liang jong ka seng ka la pyntip ba ha kane ka jingïakynduh na ka liang jong u Myntri u la kular ban shimkhia mardor ïa kane ka kam bad hakhmat jong ki nongïalam ka seng. Nalor kata, u Myntri u la phone ïa u Senior Director ka NTA ba un khmih bniah ïa kane ka kam bad ban pyntikna ba ki samla pule ka jylla ki dei ban ïoh thoh ïa kane ka eksamin hapoh ka jylla lajong.
