Shillong, Nohprah 21
U Myntri ka tnat pule puthi u Rakkam A Sangma u la ïathuh ba ka baibam lane scholarship jong ki samla pule la dep pyllait teng ïa ka pisa lyngba ka tnat Tribal Affairs kaba la kot palat T. 52 klur jong u snem 2022-2023.
Haba ïakren bad u Rakkam, u la ong ba haba ïadei bad ka post matric scholarship, ki samla kiba dei kiba shu pynthymmai (renewal) ki don 25,512 ngut jong u snem 2022-23.
Hynrei ka pisa kaba la pyllait ïa ka baibam ka dei na ka bynta 22,986 ngut katba ki 2,526 ngut ka sahteng namar ki don ki jingbymbiang kum ka bank account, IFSC code bad kiwei kiwei.
U la ïathuh ba ha u snem 2022-2023, kiba la thep thymmai ban ïoh baibam ki long 41,514 ngut, bad na kine, la pyllait ïa ka pisa kaba dei ka baibam sha ki 14,420 ngut.
Hynrei na ka bynta ki palat 27,000 ngut ka dang sahteng ban pyllait ïa ka pisa lyngba ka tnat Tribal Affair ha ka wat ba-ar.
Haba kylli, u Rakkam u la ong ba ka pisa kaba la mang ka long T. 118 klur, hynrei kaba la ïohpdiang ka long T.52.33 klur katba ka pisa kaba dang sah ka dei kumba T.65 klur.
Nalor nangta u la ïathuh ba ka Sorkar Jylla ka la ïai buddien bad ïakren bad ka tnat Tribal Affairs na ka bynta ban pyllait ïa ka pisa kaba dang sahteng ban ai ïa ka baibam ki samla pule.
