Shillong, Nohprah:
Ka Meghalaya Power Transmission Corporation Limited (MPTCL) ha ka Sngi Balang ka sngew sarong ban pynbna haba ïadei bad ka jingplie ïa ka 2×50 MVA, 132/33 KV Grid Substation, ha Phulbari, West Garo Hills, Meghalaya.
Kane ka projek thymmai ka long ka jingkynjoh ïa u mawmer ban pynkhlaiñ ïa jinglong-jingman ka bording hapoh ka thaiñ, ha kajuh ka por ban pynbiang ïa ka bording kaba lah ban shaniah.
Ha ka jingïalang plie, la donlang u Myntri Rangbah ka Jylla, u Conrad K. Sangma, Myntri ka tnad bording, u Abu Taher Mondal, Myntri ka tnad PHE, u Marcuise N. Marak, M.P. ka Tura, ka Agatha K. Sangma, Myntri ka tnad ki kam ïalehkai, Bah Shakliar Warjri, nalor ki nongmihkhmat na ka MPTCL.
Kane ka jingïalang ym tang ba ka pyni dak ïa ka jingkiew jong ka thaiñ ha ka liang ka bording, hynrei ïa ka jingminot ka MPTCL ha ka ban pynbiang ïa ka bording kaba lah ban shaniah bad kaba bit ba biang sha ki nongshong shnong ka Jylla.
Na ka liang u Myntri Rangbah u la pynpaw ka jingsngewnguh sha baroh kiba la ïadonlang ha ka jingïalang, da kaba ban jur ïa ka bynta ba kongsan jong ki projek pynroi kiba la plie ha kane ka sngi.
Haba ai jingkren ha ka jingïalang, u Myntri Rangbah u la ong, “Mynta ka sngi ka long kaba kongsan na bynta ka thaiñ jong ngi naba ngi plie ïa ki projek pynroi kiba donkam. Ka jingwanrah ïa ka Substation kaba heh ha ka thaiñ jong ngi kan wanrah jingkylla. Ha ki por ba la leit, wat hapdeng ka jingdon bording, ngi mad jingeh haba ïadei bad ka jingtlot jong ka bording (low voltage). Da ka jingplie ïa kane ka Substation bathymmai, ka thaiñ jong ngi mynta kan sa ïoh pdiang ïa ka ‘voltage’ kaba ïa ryngkat bad kiwei-kiwei ki thaiñ. Kane ka long ka lynti jong ka jingmanbha ha ka ban pyntikna ïa ka jingïaineh bad ka bording kaba bha na bynta ka imlang-sahlang.”
Ha kane kajuh ka sngi, la buh ïa u mawnongrim na bynta ban shna ïa ka Indoor Stadium ha J.P. Higher Secondary School, Bholarbhita, West Garo Hills. Haba pynpaw ka jingsngewnguh, u Myntri Rangbah u la ai khublei ïa u Myntri ka tnad ki kam ïalehkai uba la lah ban pynïoh T.9 klur na bynta ban tei ïa ki ‘Gallery’ bad ‘Artificial Turf’ – kaba synñiang sha ka jingkiew jong ki kam ïalehkai hapoh ka thaiñ.
U Myntri ka tnad bording, u Abu Taher Mondal, haba kren halor ka jingdonkam jong katei ka Substation thymmai, u la ong, “Da ka jingplie ïa kane ka Substation, ngi kyrmen skhem ban pynurlong ïa ka jingdawa bording jong ka West Garo Hills. Kane ka long ka sakhi ïa ka jingtreishitom ka Sorkar ban pynkylla ïa ka jinglong-jingman ka bording jong ka thaiñ.”
Hapoh jong ka North Eastern Region Power System Improvement Project (NERPSIP), ha ryngkat ka jingkyrshan pisa na ka World Bank, ka projek ha West Garo Hills, Meghalaya, ka long kaba donkam bha. La khmih lynti ba ka jingplie ïa ka Phulbari kan pynbeit ïa ka mat sahteng haba ïadei bad ka jingtlot ka bording hapoh ka thaiñ, da kaba synñiang sha ka jingnang kiew jong ka ïoh ka kot hapoh ka thaiñ.
Ka jinglut na bynta ki song bapher-bapher hapoh ka NERPSIP ha Phulbari ka kynthup T.73.55 klur na bynta ban shna ïa ka ‘Double Circuit Transmission Line’ – 132 KV, ka jingshna ïa ki Sub-station ba 132/33 KV, bad ‘Bay Extension’, ba kynthup ïa ka jingshna ïa ki jaka sah jong ki nongtrei.
Nalor kane, la pynlut T.33.34 klur ha ka ban shna ïa ki Sub-station 33/11 KV bathymmai, ban kyntiew shuh ïa Sub-station kiba la don lypa bad ka jingshna ïa ki 33 KV ‘line’.
