Shillong, Nohprah 21
Ka BJP Meghalaya ka la khyrwit ïa ka jingkren u MP ka TMC u Kalyan Banerjee pyrshah ïa u vice president u Jagdeep Dhankar hapoh parliament uba pyrthuh bud ïa u bad u Rahul Gandhi uba ring dur ïa ka jingpyrthuh bud jong u Banerjee.
U nongaiktien ka BJP u Bah Mariahom Kharkrang u la ong ba da kawei ka sur ka BJP Meghalaya ka pynrem ïa kane bad kynnoh ba ka dei ka kam poh ban kren beiñ ïa u vice president ka ri.
“Ngi ïa ym dei tang kum ka dak jong ka jingpyrshah ïa kaei kaba jia, hynrei ban pynsngew sha u vice president ka ri India ba baroh ngim sngewïahap bad kane ka jingjia. Baroh ki don ka mon laitluid ban kren na bynta ïalade hynrei ngi dei ban kynmaw ïa kawei ba ngi dei ban don ka nongrim ban kren da ka jingkitkhlieh, ym ban shu kren kulmar ne pyrthuh bud kumba ju leh ka liang pyrshah na ka por sha ka por” la ong u Bah Kharkrang.
U la ong ba ka jingthmu jong ki MP ka liang pyrshah ban kren beiñ ïa u Myntri Rangbahduh ka ri ka pynlong ïa ki dkhot ban kren tam pud ha kane ka sien ba mynta.
“Ka jingmut jingpyrkhat jong ki ka la poi shaduh u pud ba kim sngewthuh shuh ban pynïapher ïa ka jingpyrshah bad ka jingpynthohbria bad kane ka pynlehraiñ ïa ka ri hi baroh kawei, haduh ba ka long thamula ban peit ne sngap” la bynrap Bah Kharkrang.
