Shillong, Nohprah 21
Ka jylla Meghalaya ka la kot bad kynjoh sha u mawmer ha kaba ka la lah ban tam mynta ïa ka National Average ha ka jingpynpoi ïa ka umbam umdih sha manla ki thliew ïing lyngba ka skhim Jal Jeevan Mission kaba la kot sha ka 72.37 persen.
Kumba ka long ka jingïaid lynti jong kane ka JJM ha Meghalaya kata ha u snem 2019 ka la long tang 0.7 persen hynrei ha u snem 2023 pat ka la kiew syndon shaduh ka 72.37 persen.
Ïa kane la pyntip da u Myntri Rangbah ka Jylla Conrad K Sangma ha ka Sngi Palei ba ka jylla Meghalaya ka la kynjoh sha u mawmer ba kyrpang da ka jinglah ban kot haduh 4,71,544 tylli ki longïing kiba la ïoh ïa ka kor um ba treikam ha ïing.
Ka Meghalaya ka la nang beh ïa ka thong ban kynjoh ïa ka 100 persen, kaba pyni ïa ka jingaiti met bad mynsiem jong ka kynhun ba pyntreikam ïa ka Jal Jeevan Mission (JJM) hapoh ka Jylla.
Haba pyntip ïa kane hapoh ka X (ba tip mynshuwa da ka Twitter), u Myntri Rangbah u la ong, “Sngewkmen ban pyntip ba ka Meghalaya ka la kynjoh 4,71,544 (72.37%) ka jingtreikam ki kor um ïing kaba long palat ïa ka National Average ba 72.1%. Khublei shibun ïa ka kynhun @jjmmeghalaya kaba ïai bteng ban trei shitom bad pynthikna ba ka Meghalaya kan kynjoh ïa ka thong ba 100 persen ka jingïoh kor um ïing”.
Lah ban kdew hangne ba ïa kane ka Mission la sdang pyntreikam naduh u Nailar 2019 lyngba ka jingïatrei ryngkat hapdeng ka Sorkar India bad ki Sorkar Jylla. Ka JJM ka la buh ïa ka thong ban pynïoh ïa ki kor um ïing ha baroh ki shnong nongkyndong, ka ban pynthikna ba ki longïing kin ïoh ïa ka um kaba khuid shuwa u snem 2024.
