Shillong, Nohprah 21
U Symbud Myntri Rangbah ka jylla uba peit ïa ka tnat karkhana u Bah Sniawbhalang Dhar u la ong ba la hap ban pynkhyllem noh ïa u atoskhana ka karkhana Mawmluh Cherra Cement Limited (MCCL) namar u la rim palat bad u lah ban khyllem bad buh jingma pynban ïa ki briew.
Haba kren sha ki lad pathai khubor ha ka Sngi Palei, u Bah Sniawbhalang u la ong ba ha kaba ïadei bad ka MCCL, ka sorkar ka la ïoh pdiang ïa ka jingkyrpad na u MLA bad MDC ka thaiñ bad ki briew, ka sorkar kan pyrkhat bha shwa ha kano ka rukom kan leh kumno ban pynkhie biang ne em.
U la ong ba ka sorkar kan leh ïa kaba bha tam kumno ban leh tangba kam pat shim ïa kano-kano ka rai kumno ban leh. U la ong ba ka sorkar kan ïamir jingmut ïa ki syiem, ki rangbah shnong bad ki nongtrei ruh halor kane bad ban shim pat ïa ka rai kaba bha tam kumno ban leh.
Ha kajuh ka por, kumba la kren u Myntri Rangbah ka jylla u Conrad K Sangma ba ka sorkar ka lah ban khang noh, u Bah Sniawbhalang u la ong ba ka lah ban poi sha kata ka bynta ruh tangba ka sorkar kam pat shim ïa kano-kano ka rai.
U la ong ba ka sorkar kan pyrkhat shwa ïa ka MCCL ïa mynta bad hadien ka lah ban pyrkhat sa kawei ka bynta khamtam ha kaba ïadei bad ka kam jngohkai pyrthei.
