Shillong, Nohprah 21
Ka ilekshon na ka bynta ban jied thymmai ïa ki MDC haduh mynta ym pat lah satia ban pynthikna la kan long kumba dei lane kan shah pynslem namar ka jinghap ban pynbeit thymmai ïa ki konstitwensi ha ki ar tylli ki district council.
Kumba ka long mynta, ka jingpynbeit ïa ki konstitwensi ha ki ar tylli ki council kata ha KHADC bad JHADC ka la ïaid shaid-shaid shakhmat.
Ïa kane ka mat la ïakren ruh hapoh ka dorbar tlang jong ka KHADC ha ka motion ba la wanrah da u Nongïalam ka Liang Pyrshah u Bah Titosstarwell Chyne.
Haba jubab, u CEM Bah Pynïaid Sing Syiem u la ong ba haduh mynta ym pat tip la ka ilekshon kan long kumba dei ban long lane kan kham slem, hynrei ka jingpynkhreh ka la ïaid. U la ong ba ka samoi treikam jong ki MDC ba mynta, ka dei ban kut ha ka 4 tarik u Lber 2024, kumta ka jingpynkhreh ruh ka la ïaid, watla ym pat shai pura.
Ha kaba ïadei bad ka Delimitation Committee, u CEM u la ong ba hadien ba la shimti ban ïalam ïa ka EC la ïoh bun tylli ki shithi na ki shnong ban peit bniah biang ïa ka jinglong ki konstitwensi, bad ïa ka jingthung ïa ka Delimitation Committee la leh katkum ka jingbthah jong u Lat ka Jylla.
U la ong ba ki konstitwensi ba la pynpaw ïa ka jingdonkam ban pynbeit thymmai ki kynthup ïa ka Mawlai, Malki-Laitumkhrah, Nongstoiñ, Rambrai, Mawshynrut namar kam don shuh ka jingïaryntih ha ka jingdon paid bad kumjuh ki jinglong jong ki jaka.
U la ong ba dei halor kine ki nongrim ba ka executive committee ka la thoh sha u Lat ka jylla uba la pynmih ïa ka jingbthah ban pynbeit thymmai, bad bynrap ba ka shong ha ka Sorkar lyngba ka tnat District Council Affairs ban pynbna ïa ka tarik ilekshon.
Ka samoi treikam jong ki MDC kan kut noh ha ka 4 tarik Lber jong u snem 2024, bad ha u Rymphang ka jingjied thymmai ïa ki MDC ka la dei ban long, hynrei namar ka jingpynbeit thymmai da ki Delimitation Committee ïa ki konstitwensi ha KHADC bad JHADC, haduh mynta kiba thmu ban ïakhun ïa ka ilekshon ruh ki dang kulmar.
Haba kren ha ka por ba wanrah ïa ka motion, u Bah Titos u la ong ba ka la don ka jingkulmar jingmut, hato kata ka ilekshon kan long ne ym long ha u snem 2024, bad ki MDC kim lah ban jubab bad wat ka executive committee ruh kam lah ban jubab. U la ong ba ka jingthaw ïa ka Delimitation Committee ka long kaba biang, hynrei ka dei ban buh por.
