Shillong, Nohprah 21
Namar ka jingkhapngiah palat ka sor Shillong, ka Executive Committee hapoh jingïalam u Bah Pynïaid Sing Syiem kum u CEM ka la thoh shithi sha ka Sorkar Jylla lyngba ka tnad Pynroi Sor ban pan jaka haduh 20 akar ha Mawdiangdiang kaba don hajan ka ïingdorbar thawaiñ ka jylla khnang ban tei ïa ka shlem treikam KHADC bathymmai.
Haba jubab ïa ka jingkylli ba la wanrah da u Bah Teinwell Dkhar, MDC ka UDP na Shella ha ka dorbar tlang kaba la ïaid ar sngi, u Bah Pynïaid uba la ïathuh ba ka EC ka la dep ïakynduh ïa u Myntri Rangbah u Conrad K Sangma bad ïa u Symbud Myntri Rangbah u Bah Sniawbhalang Dhar uba peit ïa ka tnad Pynroi Sor ban pan jaka kaba heh ban ïoh jaka ïeng kali bad ka ophis kaba heh ha Mawdiangdiang hynrei ka sorkar ka tyrwa sha Mawpdang kaba ka sorkar ka thmu ban tei ïa ka Secretariat.
U la ïathuh shwa ban pynthikna ïa ka jaka, ka EC bad ka sorkar kin leit jurip lang ban peit ïa ki jaka ha Mawdiangdiang bad Mawpdang.
U la ïathuh ba ka jingkwah ban shna ïa ka shlem treikam bathymmai ha Mawdiangdiang ka long ban suk haba don marjan bad ka ïingdorbar hynrei ban ïoh jaka ha Mawpdang ka la kham jngai.
Shuh shuh u la pyntip ba ïa kane ka shlem treikam kaba don mynta ha Garikhana kaba don 3 akar, ka EC kan sa pyrkhat thymmai noh kum ka jaka khaïi-pateng ban pynmih pisa ynda la dep tei ïa ka shlem treikam ha New Shillong.
Nalor nangta u Bah Pynïaid u la pyntip ba ka EC ka la pan ei ïa ka jaka na ka sorkar bad ynda la ïoh ïa ka jaka kan sa pynkhreh sa ïa ka jingmang pisa ban tei ïa ka shlem treikam ka ban biang ki jaka ïeng kali.
Ha kajuh ka por u Bah Pynïaid u la ïathuh ba ka Executive Committee kan sa tei da ka Council Bhavan ha nongbah Delhi ban suk haba ki paidbah kin ïoh jaka sah bad leit donkam jong ka kam ophis kumba kiwei ki district council ki la dep ïoh jaka ha Delhi.
Ïa kane ka jingthmu ban tei da ka Council Bhavan ha Delhi la jubab ïa ka jingkylli ba la wanrah da u Bah Teinwell Dkhar u MDC ka UDP na Shella konstitwensi.
U Bah Pynïaid u la ïathuh ba ka shlem treikam ka la thoh shithi sha ka Tribal Affair bad u Myntri ka Sorkar India ban ai ei ka jaka ha nongbah Delhi bad ban bei pisa ban tei ïa ka Council Bhavan.
