Shillong, Nohprah 21
Namar ka jingsaphriang ka jingpang COVID ha ki katto katne ki jaka jong ka ri, ka Sorkar Jylla ruh lyngba ka tnat ka koit ka khiah ka la lum jingïalang ha ka Sngi Palei, hynrei na ka liang ka Myntri ka koit ka khiah ka Kong Ampareen Lyngdoh ka la ong ba kane ka dei tang ka jingïakynduh ban shim lypa ki lad ki lynti kum ka jingïada, bad ym dei ban khuslai namarba ym don ba ïoh ïa kane jingpang ha kane ka Jylla.
Ka World Health Organization (WHO) dang shen ka la ithuh da ka kyrteng ‘JN.1’ ne ‘variant of interest’ ïa ka jingpang COVID kaba la sdang ban don ha ki katto katne ki bynta jong ka ri.
Haba kren sha ki lad pathai khubor hadien ka jingïalang bad ki ophisar, ka Kong Ampareen ka la ong ba tang kum ka jingbatai ban shim ki lad jingïada, ka la ïakren bad ki ophisar ka tnat ka koit ka khiah.
Ka la ong ba ïa une u khñiang jingpang la lap kham katto katne por mynta u snem 2023 tangba ym don kino kino ki dak ki shin thymmai bad jingma bad ym donkam ban da khuslai ïa kata khamtam ha Jylla namar ym don kiba ïoh ïa kane ka jingshitom.
Nalor nangta ka la ïathuh ki jingpeitngor ki la ïai bteng lyngba ka Integrated Disease Surveillance Program (IDSP) jong ka tnat ka koit ka khiah bad haduh mynta hi, ym don ba ïoh COVID ha kane ka Jylla bad ym don kano kano ka jingshitom khamtam ha ka rukom ring mynsiem.
Na ka liang ka tnat ka koit ka khiah ruh ka la pynmih ka kynja jingbatai lypa khamtam ha kum kane ka aïom ba lehkmen naduh ka jingïalum bun briew bad donkam ban deng ka jingda khmut bad shyntur bad sait khuid ki kti.
Kito kiba la don jingshitom lypa kum ka king-baïong, shini, khyllai bad kiwei kiwei ki jingshitom kiba khia ki dei ban shim lypa ki lad jingïada khamtam kiba don jingshitom shitmet ne ktha ka met ka phad.
